Lluka: Ndërtimi i ‘Kosovës së Re’ fillon në pjesën e dytë të vitit 2019 (Video)

Ministri i Zhvillimit Ekonomik, Valdrin Lluka në një intervistë për Telegrafin, me gazetarin Lulzim Ahmeti, ka folur për projektin e ndërtimit të Termocentralit “Kosova e Re”, gjendjen në Telekom, Trepçën si dhe për Ligjin e ri për ndërmarrjet publike.

Ai ka thënë se projekti i Termocentralit “Kosova e Re” nuk do të dështojë sepse sipas Llukës, Kosova nuk ka alternativa tjera për të siguruar energji elektrike.

“Projekti i Termocentralit ‘Kosova e Re’ nuk do të dështojë sepse është qenësore të kemi energji elektrike të mjaftueshme për konsum. Jemi në rrugë të mbylljes së Termocentralit ‘Kosova A’ i cili ndotë ambientin. Nuk mund të qëndrojmë vetëm me blloqet e Termocentralit ‘Kosova B’ sepse do t’i kishim vetëm gjysmën e nevojave konsumuese të energjisë. Prandaj, çdo tendencë për ta anuluar projektin e ‘Kosovës së Re’ do t’i sillte dëme jashtëzakonisht të mëdha vendit. Ky projekt do të vazhdojë. Kemi shpallur fazën parakualifikuese për operatorët të cilët do ta ndërtojnë këtë termocentral”, ka thënë ministri Lluka.

Sipas tij, Qeveria e Kosovës, deri më tani nuk ka marr ndonjë konfirmim zyrtar se Banka Botërore nuk do të përkrah ndërtimin e Kosovës së Re.

Ai ka treguar se teknologjia në Termocentralin “Kosova e Re” do të jetë e teknologjisë së fundit me ndotje minimale të ambientit.

Por pavarësisht problemeve, ministri i Zhvillimit Ekonomik, Valdrin Lluka ka bërë të ditur se ndërtimi i Termocentralit “Kosova e Re”, pritet të fillojë në vitin 2019.

“Ndërtimi i Termocentralit ‘Kosova e Re’ do të fillojë, mes muajt të 3-të dhe të 6-të, të vitit që vjen. Pra procesi i ndërtimit do të fillojë në çerekun e dytë të vitit 2019”, tha ai.

Ai ka thënë se në sytë e investitorëve të huaj, Kosova renditet në mesin e vendeve të rrezikshme për të investuar.

Por, investimi 1.3 miliard eurove në Termocentralin “Kosova e Re” me një kapacitet prej 500 megavat orë energji elektrike do të ndikojë edhe në tarifat që do të paguajnë konsumatorët.

“Pritjet tona janë që çmimi për megavat të jetë prej 65 deri 70 euro në ‘Kosovën e Re’. E këto çmime mund të ndikojnë prej 25 deri në 30 për qind në tarifat e energjisë elektrike. Edhe ashtu Kosova është në mesin e vendeve me çmime të rrymës të lirë “, tha ministri Lluka.

Po ashtu ai ka folur edhe për gjendjen në Telekomin e Kosovës, për të cilin ka thënë se është në gjendje të vështirë dhe se duhen të ndërmerren masa për të dalë nga kriza.

Ndërkaq për Trepçën, ka thënë se statuti dhe ligji i ri do t’i hapin rrugë investimeve të huaj.

Kreu i MZHE-së, ka treguar se janë në proces të hartimit të Ligjit për ndërmarrjet publik. /Telegrafi/