Linda Yaccarino thotë se është e emocionuar për të ndihmuar në transformimin e Twitter

Drejtoresha ekzekutive e sapoemëruar e Twitter, Linda Yaccarino, tha në një postim në Twitter të shtunën se ajo është frymëzuar nga vizioni i pronarit Elon Musk për të krijuar një të ardhme më të ndritshme dhe është e emocionuar për të ndihmuar në transformimin e platformës së mediave sociale.

Kjo, sipas mediave të huaja, përcjell Telegrafi, ishte hera e parë që Yaccarino foli publikisht që nga lajmi i publikuar të enjten se ajo ishte në bisedime për t’u bërë CEO e ardhshme e Twitter.

Musk, që ka shërbyer si CEO që nga blerja prej 44 miliardë dollarësh e Twitter tetorin e kaluar, njoftoi emërimin e saj të premten.

“Unë jam frymëzuar prej kohësh nga vizioni i Musk-ut për të krijuar një të ardhme më të ndritshme. Jam e emocionuar të ndihmoj të sjell këtë vizion në Twitter dhe ta transformojmë këtë biznes së bashku!”, ka shkruar Yaccarino.

Yaccarino, e cila si shefe reklamash për NBCUniversal të Comcast Corp kaloi disa vite duke modernizuar biznesin e saj të reklamave, tha se ajo është e përkushtuar për të ardhmen e Twitter dhe tha se reagimet e përdoruesve janë jetike për të ndërtuar Twitter 2.0.

Yaccarino do të marrë përsipër një platformë të mediave sociale që është përpjekur të ndryshojë një rënie në të ardhurat nga reklamat dhe është e përfshirë me sfida, së bashku me një ngarkesë të madhe borxhi. /Telegrafi/