Lëviz themeli i Shkollës së Muzikës në Pejë (Video)

Fuqia e ujit nga një gyp që shpërtheu prishi punimet prej 60 mijë eurosh në objektin e shkollës së muzikës në Pejë.

60 mijë euro të Komunës së Pejës shkuan dëm kur një gyp i ujësjellësit shpërtheu dhe lëvizi themelet e objektit të shkollës së muzikës

Shpërthimi i gypit dhe lëkundja e themelit të shkollës në ndërtim shkaktoi dëme të pariparueshme dhe ndërprerje të punimeve.

Zëdhënësi i Komunës së Pejës, Engelbert Zefaj, ankohet kur flet për KALLXO.com se e tërë puna ndërtuese e bërë deri tash është shkatërruar.

“Pasi që ka përparuar në punimet e para (kompania kontraktuese) në etazhën nëntokësore, aty gjatë natës diku ka shpërthyer një tub i ‘Hidrodrinit’ dhe ai tub ka rrjedhë gjatë gjithë natës dhe e ka mbushur, e ka ngopur shumë tokën me ujë. Fuqia e ujit ka arritur që ta lëviz tërësisht platformën e shkollës së muzikës, ta spostojë për disa metra në nivel dhe kështu e ka dëmtuar gjithë punën e realizuar deri në atë ditë”, tha Zefaj.

Ai tregoi se komuna menjëherë ka formuar një komision për vlerësimin e dëmeve dhe përcaktimin e shkaktarit të tyre, ndërsa sipas Zefajt komisioni e ka nxjerrë fajtore Kompaninë Rajonale të Ujësjellësit “Hidrodrini”.

“Ne kemi komunikuar me kompaninë ‘Hidrodrini’, ne kemi kërkuar mirëkuptim që ata ta pranojnë raportin e komisionit vlerësues dhe të kompensojnë dëmin e shkaktuar, sepse sipas konstatimeve tona ata janë fajtorë,” tha ai.

Por drejtori i Hidrodrinit” Agron Tigani shpërthimin e gypit e konsideroi aksidental.

“Ne jemi në fazën e vlerësimit dhe ende nuk kemi marrë kurrfarë raporti vlerësues të komisionit komunal. Gypi ka qenë gjithmonë aty-denbabaden, ajo çfarë ka ndodhur është një fatkeqësi. Pasi të shqyrtohen raportet e komisioneve vlerësuese do shikohen mundësitë nëse gjendet gjuhë e përbashkët, nëse jo rasti do procedohet në gjykatë,” tha drejtori i “Hidrodinit” për KALLXO.com.

AAK-ja, subjekti më i madh opozitar në Pejë për lëvizjen e themeleve të shkollës së muzikës e bën fajtore komunën.

“Pasojat kanë qenë evidente me fillimin e punimeve në atë objekt. Këtë shqetësim personalisht e kam ngritur në asamblenë komunale kur e kam pyetur kryetarin e komunës a ka leje ndërtimi ky objekt. Nuk kamë marrë përgjigje edhe pse kryetari ka qenë në sallë i pranishëm sepse të gjithë e kemi ditur që nuk ka leje ndërtimi. Mospasja e lejes së ndërtimit ne mendojmë që i ka pru pastaj problemet tjera”, tha Naim Sahiti, kryetar i AAK-së në Pejë.

Sipas tij rrjeti i ujësjellësit në atë lagje është i instaluar që 30 vjet dhe siç tha ai është qesharake të fajësohet kompania e ujësjellësit për atë që ka ndodhur.

Sahiti deklaroi se edhe rreth 25 mijë euro do t’i kushtojë buxhetit komunal pastrimi i themelit të dëmtuar.

Komuna planifikon që vitin e ardhshëm të fillojë për herë të dytë punimet për ndërtimin e shkollës së muzikës në po të njëjtin vend. /KALLXO.com/