LeBron refuzon t’i kritikojë bashkëlojtarët për mungesë angazhimi

LeBron James ka refuzuar t’i kritikojë bashkëlojtarët e tij pas humbjes së Cleveland Cavaliers në ndeshjen e tretë të ‘play-offit’ nga Indiana Pacers.

Cavaliers patën epërsi prej 17 pikësh në fund të pjesës së parë, mirëpo në dy çerekët e fundit ata e humbën përqendrimin dhe kundërshtari e fitoi ndeshjen me dy pikë epërsi (92-90).

Në këtë mënyrë, Indiana është në avantazh prej 2-1 me lojë në kuadër të rrethit të parë të serive të ‘play-offit’.

Pas ndeshjes së zhvilluar në Bankers Life Fieldhouse, gazetarët e kanë pyetur lojtarin kryesor të Clevelandit në lidhje me kontributin e bashkëlojtarëve të tij.

“Çfarë po kërkoni nga unë? Mendoni se do t’i hedh bashkëlojtarët e mi nën autobus? Unë nuk jam i tillë”.

“Basketbollistët duhet të luajnë më mirë. Duke më përfshirë edhe mua. Unë i humba gjashtë topa. Isha i tmerrshëm në çerekun e tretë, nuk munda të bëj asnjë gjuajtje”, është shprehur LeBron, citon SlamOnline.

James e përfundoi ndeshjen me 28 pikë, 12 kërcime dhe tetë asistime. /Telegrafi/