LD: Diskriminim etnik në shëndetësi, numrat alarmante për vitin 2022

Sot, Rexhep Memedi nga Lëvizja Demokratike ka bërë një deklaratë për shkak të shqetësimit për diskriminimin e vazhdueshëm të shqiptarëve në çdo sektor nga pushteti i korruptuar i vendit. Në fjalën e tyre, ata kanë theksuar se kjo padrejtësi ka shtrirë ndikimin e saj në shëndetësi për më shumë se 20 vite, dhe aktualisht është në nivele alarmanate.

Në fokus të deklaratës është situata në shëndetësi, ku, sipas tyre, diskriminimi ka arritur përmasa të shqetësuese. Ata kanë prezantuar numra konkrete për vitin 2022 për të ilustruar dallimet në fondet e ndara për shërbimet shëndetësore në disa qytete.

“Në vitin 2022, Fondi i sigurimit shëndetësor për Spitalin Klinik të Shtipit kishte ndarë 12.137 denarë për kokë të të siguruarit, në Spitalin Klinik të Manastirit kishte ndarë 9.608 denarë, kurse për Spitalin Klinik të Tetovës vetëm 4.599 denarë për kokë të siguruarit. Dallimi i dukshëm është edhe në mjetet e ndara për shtëpitë e shëndetit. Kështu p.sh, Fondi i shëndetësisë për Shtëpinë e shëndetit në Kratovë kishte ndarë 6.178 denarë për kokë të të siguruarit, ndërsa për Shtëpinë e Shëndetit në Tetovë 890 den. Dmth 7 herë më shumë marrin banorët e Kratovës sesa ata të Tetovës!

Aspak nuk dalloi edhe ndarja e mjeteve për Qendrat e shëndetit publik. Qendrës në Manastir i janë ndarë nga 742 denarë për kokë të të siguruarit, kurse Qendrës në Tetovë vetëm 290 denarë. Vetëm për ilustrim, Fondi për Sigurim Shëndetësor me kuadër të BDI-së që vjen nga Tetova, qytetarët e Tetovës në total i diskriminon kumulativisht me mbi 25 milion euro më pak para vetëm për vitin 2022″, thonë nga LD.

Në përfundim, Lëvizja Demokratike ka bërë thirrje për ndryshime dhe përmirësime thelbësore në sektorin e shëndetësisë pas zgjedhjeve të 8 majit, duken premtime për një fund të kësaj shpërndarje diskriminuese dhe një përmirësim të situatës së pashpallur shëndetësore për qytetarët në baza etnike. /Telegrafi/