Kurti takoi delegacionin nga misioni i vëzhguesve BE-së, biseduan për mbarëvajtjen e zgjedhjeve

Kryetari i Lëvizjes Vetëvendosje, Albin Kurti gjatë ditës së djeshme ka pritur në takim një delegacion nga Misioni i Vëzhguesve të Zgjedhjeve të BE-se në Kosovë, të përfaqësuar nga Marian Gabriel, zv. Shef i Misionit,  Dominic Howell, shef i Zyrës së Analizës Politike dhe Eirini Skouzou, shefe e Zyrës Ligjore të Misionit.

Në njoftimin e bërë nga Vetëvendosje thuhet se, në takim është diskutuar për mbarëvajtjen e zgjedhjeve, procesin e qetë dhe të rregullt, si dhe për raportin preliminar të vëzhguesve të BE-së, rekomandimet e raportit përfundimtar që do të shërbejnë si bazë e mirë për të përmirësuar infrastrukturën ligjore dhe forcimin e kapaciteteve institucionale, transmeton Telegrafi.

“Ishte vlerësim i përbashkët se dita e zgjedhjeve në përgjithësi ishte e rregullt dhe e qetë, në përjashtim të vendvotimeve në mesin e komunitetit serb të Kosovës, ku partitë që synuan të garojnë nuk ishin në gjendje të zhvillojnë fushata efektive për shkak të frikësimit të kandidatëve, familjeve të tyre dhe votuesve në përgjithësi. Kjo kufizoi ushtrimin e të drejtave themelore demokratike për lirinë e shprehjes, tubimit dhe përfaqësimit, dhe për rrjedhojë, procesi zgjedhor për serbët e Kosovës nuk i përmbushi standardet e zgjedhjeve të lira dhe të ndershme”, thuhet në njoftimin e VV-së.

Vetëvendosje bën të ditur se delegacioni i Misionit të Vëzhguesve të BE-së ka paralajmëruar publikimin e raportit përfundimtar dhe rekomandimet që synojnë forcimin e procesit zgjedhor, rritjen e transparencës, ngritjen e kapaciteteve institucionale për organizimin e zgjedhjeve.

“Rekomandimet e vëzhguesve të BE-së do të jenë bazë e mirë për përmirësimin e infrastrukturës ligjore të zgjedhjeve në përgjithësi, duke krijuar kushte që edhe në mesin e komunitetit serb të Kosovës të kemi zgjedhje të lira, garë të pacenueshme, e mjedis politik demokratik”, vijon njoftimi./Telegrafi/