Kurti pas takimit me kryeministrin kroat Plenkoviq: Marrëdhëniet tona ekonomike janë të mira, ne mund t’i rrisim edhe më tej

Marrëdhëniet ekonomike ndërmjet Kosovës dhe Kroacisë janë të mira por se ne mund t’i rrisim edhe më tej.

Kështu ka thënë kryeministri Albin Kurti pas takimit me homologun e tij Andrej Plenkoviq, duke shtuar është i gatshëm të bashkëpunojë në fushën e biznesit.

“Folëm për zbatimin e 12 marrëveshjeve që kemi si dhe 7 marrëveshjeve që shpresojmë që t’i intensifikojmë së shpejti. Biseduam për mundësinë dhe potencialin që kanë te dy vendet për bashkëpunim bilateral, që do të siguroj ringjallje më të shpejtë nga kriza, duke përfshirë dhe ngritjen e investimeve si dhe shkëmbimeve ekonomike e tregtare”, tha Kurti, përcjell Telegrafi.

Ai ka shtuar se synimi i Kosovës është krijimi i një mjedisi më të favorshëm për të tërhequr investitorët potencial.

Lexo po ashtu Kurti: Kroacia është model i shkëlqyer që duhet ndjekim për anëtarësimin tonë në NATO dhe BE

“Një nga synime tona është krijimi i një mjedisi më të favorshëm për të tërhequr kompanitë dhe investitorët potencial në mënyrë që të krijojmë ekonomi më të qëndrueshme. Marrëdhëniet tona [ekonomike] janë të mira, por ne mund t’i rrisim edhe më tej. Kryeministri Plenkoviq ka ardhur së bashku me drejtues të korporatave më të fuqishme në Kroaci të cilat udhëheqin në fushën e energjisë, telekomunikacionit dhe odave ekonomike atje”, ka shtuar ai.

“Në frontin ekonomik jemi të bindur se mund të punojmë së bashku si në fushat e biznesit, pastaj në shkëmbimin e përvojave në fushën e mbrojtjes, të konsumatorit, anti-dumping dhe instrumenteve të tjera të tregut”, përfundon Kurti. /Telegrafi/