Kurti mbledh për herë të fundit kabinetin qeveritar për këtë vit, merren tetë vendime

Kryeministri i Kosovës, Albin Kurti, të premten mbajti mbledhjen e fundit të kabinetit qeveritar për vitin 2024.

Në këtë mbledhje, pa asnjë çështje jashtë rendit të ditës, u miratuan tetë vendime të rëndësishme që prekin fusha të ndryshme, si mirëqenia sociale, menaxhimi i mbeturinave, politika e jashtme dhe zhvillimi ekonomik.

Shtesa për fëmijët dhe pensionistët
U miratua ndarja e shtesave prej 100 eurosh për fëmijët 0-16 vjeç dhe për pensionistët, si masë mbështetëse sociale.

Rregullorja për mbrojtjen nga dhuna në familje
U aprovua një rregullore e re për organizimin dhe funksionimin e Zyrës së Koordinatorit Kombëtar për mbrojtjen nga dhuna në familje dhe ndaj grave, si pjesë e Strategjisë Kombëtare për mbrojtjen nga dhuna.

Sanksione ndërkombëtare ndaj Rusisë
Qeveria ndryshoi dhe plotësoi vendimin për zbatimin e sanksioneve ndaj individëve dhe entiteteve që kërcënojnë integritetin territorial të Ukrainës, në përputhje me politikat e BE-së.

Shpronësimi i pronave për terminalin doganor në Merdare
U miratua një vendim preliminar për shpronësimin e pronave për interes publik, për të ndihmuar funksionalizimin e terminalit doganor në Merdare.

Ndryshimet në rregullat e origjinës sipas Konventës Pan-Euro-Mesdhetare
U miratuan ndryshime strategjike për të nxitur eksportet, përmirësuar konkurrencën dhe tërhequr investime të reja.

Marrëveshja me EFTA-n
Ministrja e Industrisë, Ndërmarrësisë dhe Tregtisë do të nënshkruajë një marrëveshje me shtetet e EFTA-s, për të përmirësuar marrëdhëniet ekonomike dhe tregtare, duke lehtësuar eksportet vendore.

Strategjia për menaxhimin e integruar të mbeturinave 2024-2035
Synohet riciklimi i 50% të mbeturinave deri në vitin 2035 dhe reduktimi i deponimit nën 10% deri në vitin 2045, duke krijuar një model më të qëndrueshëm dhe të dobishëm për mjedisin.

Miratimi i dokumentacionit zyrtar të mbledhjeve të kaluara
U aprovuan procesverbalet dhe transkriptet e mbledhjeve të mëparshme, duke garantuar transparencë dhe përgjegjshmëri në punën e Qeverisë.

Këto vendime pasqyrojnë angazhimin e Qeverisë së Republikës së Kosovës për përmirësimin e jetës së qytetarëve, rritjen e mirëqenies dhe zhvillimin e qëndrueshëm të vendit./Telegrafi/