Kryeministri Albin Kurti i ka dorëzuar këtë të enjte zyrtarëve të Republikës së Çekisë aplikimin e Kosovës për anëtarësim në Bashkimin Evropian, shtet ky që kryeson  Presidencën e Këshillit të BE-së.

Në Pragë, Kurti është pritur nga ministri për Çështje Evropiane të Çekisë, Mikulas Bek.

Siç ka bërë të ditur Zyra e Kryeministrit, ceremonia e dorëzimit do të shoqërohet me një konferencë të përbashkët të kryeministrit Kurti dhe ministrit Bek.


Ndryshe, presidentja e Kosovës, Vjosa Osmani, kryeparlamentari Glauk Konjufca dhe kryeministri Albin Kurti kanë nënshkruar të mërkurën aplikimin për anëtarësim të Kosovës në BE.

Osmani në fjalën e saj pas ceremonisë së nënshkrimit, ka thënë se Kosova si një vend i paqes dhe i respektimit të të drejtave të njeriut, e meriton të jetë pjesë e BE-së.

Njëjtë ka deklaruar edhe kryeparlamentari Konjufca, duke shtuar se BE-ja është e plotë vetëm kur të gjitha kombet evropiane do të jenë pjesë e saj.

Ndërsa, kryeministri Kurti teksa ka njoftuar se aplikimi do t’i dorëzohet Presidencës Çeke të BE-së në Pragë, ka thënë se “pengesat dhe sfidat i kalojmë me zhvillim demokratik dhe progres shoqëror”. /Telegrafi/