Kryeziu: Hedhja e fajit ndaj njëri-tjetrit, po e dëmton imazhin e ‘koalicionit’ LVV-LDK

Drejtori Ekzekutiv i Institutit Demokratik të Kosovës, Ismet Kryeziu, konsideron se largimi i pozitës se presidentit nga tryeza e diskutimeve, do e relaksonte skenën politike dhe do i rikthente arsyen, respektin dhe vlerat pse qytetaret kane besuar në një koalicion të mundshëm LVV-LDK.

Përmes një shkrimi në Facebook, ka thënë se ‘nëse zgjedhja e drejtpërdrejtë e presidentit nuk është opsion, atëherë përmes një konsensusi të gjerë politik, duhet të jetë prioritet i koalicionit qeverisës – konsensus ku do të përfshiheshin dhe partitë politike opozitare.’

“Jo vetëm numrat e duhur për president, por dhe zhvillimet tjera qe e presin qeverinë, do e bëjnë të pashmangshme nevojën për një konsensus të gjerë politik e shoqëror. E ndoshta bash atëherë, pas në viti e me shumë, pozita e presidentit do jetë pika kritike dhe nevoja e këtij konsensusi. Ndryshe, secila marrëveshje për pronësi partiake mbi pozitën e presidentit nga sot, s’do ja garantoje jetëgjatësinë kësaj qeverie, por do ta sjellë efektin e kundërt, shkurtimin e jetës së kësaj qeverie”, ka thënë Kryeziu.

Sipas tij, hedhja e fajit njëri –tjetrit, janë duke e dëmtuar imazhin e një koalicioni LVV-LDK.

“Maksima ‘’për ta bërë veten të pafajshëm, duhet t’i shpallim të gjithë të tjerët fajtor’’ në këtë realitet të ri politik nuk vlen. Sepse tani s’ka fajtor tjetër, e shigjetat i keni kthyer ndaj njeri tjetrit. Prandaj, zvarritja e marrëveshjes dhe përplasjet publike, sa janë duke e dëmtuar imazhin e këtij koalicioni të mundshëm, me shumë janë duke e minuar besimin për funksionimin e mëtejshëm të këtij koalicioni. Si qytetar, më së paku për mua ka rendësi kush do jetë president. Së paku, sot, më kishte interesuar të diskutohet për parimet, vlerat qeverisëse, prioritet dhe planet se si do i adresoni të priturat e qytetarëve”, ka shkruar ai. /Telegrafi/