Përfundon takimi mes Kurtit e Lajçakut

E plotësuar: Ka përfunduar takimi mes kryeministrit Albin Kurti me Përfaqësuesin Special të BE-së për dialogun Kosovë-Serbi, Miroslav Lajçak dhe ambasadorin amerikan në Prishtinë, Jeff Hovenier.

Pas përfundimit të takimit nuk ka pasur prononcim për media.

Kurti gjatë ditës ka zhvilluar takim edhe me ambasadorët e QUINT-it.

Zyra e kryeministrit ka njoftuar se temë qendrore e diskutimit ishte procesi i dialogut, propozimi evropian dhe rruga përpara.

Theksohet se Kurti i njoftoi ata me qëndrimet e Qeverisë përfshirë këtu edhe gjashtë pikat e prezantuara në Seancën e Kuvendit javën e kaluar në lidhje me marrëveshjen e Brukselit të vitit 2013.

Ndër të tjerash, ai tha se Kosova ka dëshmuar përkushtimin e saj për dialog përmes qasjes konstruktive dhe propozimeve kreative. /Telegrafi/

—–

Pas ambasadorëve të QUINT-it, Kurti nis takimin me Lajçakun

Kryeministri Albin Kurti është takuar me emisarin e Bashkimit Evropian për dialogun Kosovë-Serbi, Miroslav Lajçak.

Takimi, i cilësuar si drekë pune, po mbahet në një restorant në kryeqytetin e Kosovës.

Telegrafi bën të ditur se edhe ambasadori amerikan në Prishtinë, Jeff Hovenier, është pjesë e këtij takimi.

Më herët, Kurti është pyetur nëse do të diskutojë për Asociacionin e dialogun me Serbinë, por ka hezituar të përgjigjet.

“E kemi edhe një drekë pune me emisarin e veçantë të Bashkimit Evropian për Ballkanin dhe për dialogun Kosovë-Serbi, Lajçak. E më pastaj do të mund të flasim për këto gjëra, pasdite. Do t’iu tregojmë se çfarë temash do të diskutojmë”, ka thënë Kurti.

Lexo po ashtu Kurti ia prezanton QUINT-it gjashtë pikat e Asociacionit dhe shpreh gatishmërinë për takime të radhës në Bruksel

Më herët, Kurti, gjatë një interviste për Associated Press, u bëri thirrje fuqive perëndimore që të mos i bëjnë presion Prishtinës që të pranojë themelimin e Asociacionit të komunave me shumicë serbe, çështje që po rrit tensionet midis Kosovës dhe Serbisë.

“Perëndimi duhet të përqendrohet që ta bëjë Serbinë më demokratike dhe të largojë, ato që ai i quajti ide hegjemoniste të Beogradit. Qeveria serbe duhet të pranojë pavarësinë e të gjitha ish-republikave jugosllave në mënyrë që “të përballet me të kaluarën”, është shprehur Kurti.

Ai theksoi se Beogradi duhet të anojë më shumë drejt Bashkimit Evropian dhe NATO, e jo drejt Rusisë”, deklaroi kreu i Qeverisë./Telegrafi/