Kremlini i liroi nga burgu që të luftojnë në Ukrainë, pjesëtari i Wagnerit pranon se ka vrarë 200 persona – thotë se Putini nuk ua dha paratë e premtuara

Ish-pjesëtari i grupit mercenar rus Wagner, Vladislav Zamkov, 33-vjeç, ka thënë se derisa ka vuajtur dënimin me burg prej tetë vitesh për shkak të konsumimit dhe shitjes së drogës, i ishte bashkuar grupit Wagner dhe ishte dërguar në Ukrainë për të luftuar.

Për pesë muaj kishte marrë pjesë në luftime në Bakhmut. Pasi ishte plagosur, është rikthyer në shtëpi ku është pritur nga gruaja dhe tre fëmijët.

“Kam vrarë më shumë se 200 persona. Jam rikthyer në shtëpi në vendin tim, atje jam i padobishëm”, tha Zamkov.

Videot me pretendimet dhe informacionet që Zamkov i ka dhënë janë shpërndarë në rrjetet sociale dhe janë shikuar nga qindra mijëra persona, e ato u publikuan edhe në disa media ruse.

Ndër ata persona që shpërndau videot e tij është edhe këshilltari i ministrit ukrainas Anton Gerashchenko, si dëshmi për atë se çfarë kanë bërë rusët mbi popullatën civile ukrainase.

Zamkov jeton në qytetin Pitkyaranta në veriperëndim të Rusisë. Në atë qytet jetojnë më shumë se 11 mijë persona, kurse ai pretendon se gjendja në këtë qytet është e rëndë – ku shumë qytetarë janë të papunë, ndërtesat janë të braktisura sikurse edhe parqet e fëmijëve.

“Nuk jam politikan. Jam qytetar i rëndomte dhe jam ngopur me këtë.”, thotë Zamkov duke pretenduar se duan sërish ta dërgojnë në vijën e frontit në Ukrainë.

Madje tha se ka mbetur pa shtëpi dhe se i ka borxh shtetit rus mbi 1 milion rubla. Ankohet se ka mbetur i papunë dhe vazhdimisht e thekson se ka vrarë qindra persona në Ukrainë.

Thotë se presidenti rus Vladimir Putin nuk ua ka dhënë paratë e premtuara të burgosurve që kanë luftuar në Ukrainë dhe që janë liruar.

Madje banka ia ka marrë apartamentin, kurse familja e tij jeton aty ilegalisht – duke u zotuar se nëse ndokush i troket do ta qëllojë me plumb në kokë. /Telegrafi/

Former Wagner PMC member Vladislav Zamkov returned to the town of Pitkyaranta, Republic of Karelia, Russia, and showed the state of the town.

According to Zamkov, he killed more than 200 people in the war, and his apartment was taken away from him for debt. Now he, his wife and… pic.twitter.com/ps0uKcLnRU

— Anton Gerashchenko (@Gerashchenko_en) June 26, 2024