Kreditë e këqija, 170 milionë euro

Në fund të vitit 2015 niveli i kredive të këqija në Kosovë ka arritur në rreth 170 milionë euro, derisa në fund të vitit paraprak shuma e kredive të këqija kishte arritur në rreth 165 milionë euro

Niveli i kredive joperformuese në vend është duke rënë nga viti në vit, pavarësisht se situata ekonomike në vend është duke u keqësuar në vazhdimësi.

Në raportin e fundit të Bankës Qendrore të Kosovës (BQK) shihet se deri në fund të vitit që lamë pas niveli i kredive joperformuese ka arritur në 170 milionë euro apo 6,2 për qind e nivelit të përgjithshëm të të gjitha kredive në vend e derisa gjatë vitit paraprak niveli i kredive të këqija në vend ishte 8,3 për qind apo rreth 165 milionë euro, shkruan “Zëri”.

Në raportin vjetor të Bankës Qendrore të Kosovës shihet se gjatë vitit që lamë pas shuma e depozitave në vend kishte arritur në 2,7 miliardë euro, ku vërehet një rritje prej 6,5 për qind në raport me vitin paraprak.

“Rritjes së depozitave ndër të tjera ka mundur t’i ketë kontribuuar edhe ndërprerja e trendit rënës së normave të interesit në depozita që nga tremujori i dytë i vitit 2015”, thuhet në raport.

Niveli i kredive të këqija bie për 2,1%

Në raportin vjetor të vitit 2015 të BQK-së thuhet se rreziqet ndaj të cilave ekspozohet sektori bankar i Kosovës mbeten në nivel të ulët edhe në vitin 2015. Sipas tyre, për më tepër, sektori bankar regjistroi rënie të ekspozimit ndaj rrezikut kreditor.

“Në vitin 2015 raporti i kredive joperformuese (KJP) ndaj gjithsej kredive zbriti në 6,2 për qind nga 8,3 për qind sa ishte në vitin 2014. Kjo rënie ishte rezultat i zvogëlimit të vlerës së kredive joperformuese, si dhe rritjes së përshpejtuar të stokut të kredive gjatë vitit 2015. Kosova vazhdon të jetë vendi me cilësinë më të mirë të portofolit kreditor krahasuar me vendet e tjera të rajonit, të cilat kanë një mesatare të raportit të KJP-ve ndaj gjithsej kredive prej rreth 16 për qind. Për më tepër, mbulueshmëria e kredive joperformuese me provizione për humbje nga kreditë në vitin 2015 është rritur, që tregon për mbrojtje të mirë të sektorit nga humbjet e mundshme. Raporti i mbulimit të kredive joperformuese me provizione në vitin 2015 është rritur në 115,1 për qind nga 114,4 për qind në vitin 2014”, thuhet në raportin e BQK-së për vitin 2015. /Zëri/