Kotzias: Me komision të përbashkët do t’i japim fund irredentizmit në IJRM

Në një intervistë për televizionin kombëtar grek ERT, ministri për punë të jashtme i Greqisë, Nikos Kotzias tha se duhet të priten zgjedhjet lokale të 15 tetorit dhe të shihet nëse Qeveria e re e Shkupit do ta forcojë pozitën e saj për të hyrë në negociata më serioze për zgjidhjen e çështjes ë emrit, përcjell Telegrafi Maqedoni.

Sipas Kotzias, prapa problemit të emrit fshihet edhe problemi i irredentizmit te fqiu i tyre verior.

“Shpresoj dhe besoj se nga ana e tyre do të ndërmerren masa për kufizim të irredentizmit”, thotë shefi i diplomacisë greke dhe shton se për këtë temë në New York ka biseduar me homologun e tij të Maqedonisë, Nikolla Dimitrov, duke e cilësuar atë si “person jashtëzakonisht interesant”.

“U dakorduam për formimin e një komisioni të përbashkët nga nëntori i këtij viti, i cili në afat prej katër muajsh do të duhet ta përfundojë punën e vet – largimin e irredetizmit nga tekstet shkollore dhe hartat gjeografike në to. Ky është një hap shumë i rëndësishëm, por pasojnë edhe hapa tjerë për të cilët tanimë kemi diskutuar”, tha Kotzias.

Në pyetjen se a është i mundur anëtarësimi i Maqedonisë në NATO dhe BE pa zgjidhjen e kontestit të emrit, Kotzias u shpreh se është e domosdoshme që në fillim të mbyllet çështja e emrit siç është e paraparë edhe në Marrëveshjen e përkohshme.

Ndërsa për shkrimet në mediat greke se propozimi i Atinës zyrtare për emrin është “Maqedonia e Vardarit”, Kotzias tha se nga ana greke nuk janë dhënë propozime, ndërsa ato shkrime i vlerësoi si interpretime të lira të gazetarëve./Telegrafi/