Kosova e motivuar, dëshiron fitore ndaj Norvegjisë

Momenti i të vërtetës ka ardhur. Kosova përballë Norvegjisë, në një ndeshje shumë të rëndësishme. Dardanët janë të motivuar dhe duan fitoren në shtëpi, të përkrahur edhe nga tifozët vendas.

Përgatitjet kanë shkuar shumë mirë dhe motivimi është i jashtëzakonshëm për fitore ndaj norvegjezëve. Takimi i parë kishte përfunduar 86-77 në të mirë të Norvegjisë, duke ‘obliguar’ basketbollistët e Kosovës të fitojnë këtë sfidë.

Në Grupin C të rrethit të parë parakualifikues për Eurobasket 2025, ku bën pjesë edhe Danimarka, të tri kombëtaret kanë nga një fitore e një humbje, ku të gjitha kanë gjasa të kualifikimit.

Për Kosovën është një rast i mirë të fitojë dhe në ndeshjen e fundit ndaj Danimarkës, të kërkojë kualifikimin tutje. Dardanët i kanë mundur danezët 78-73. Vendi i parë kualifikohet direkt, si dhe vendi i dytë më i mirë nga tri grupet parakualifikuese.

Interesimi edhe nga tifozët është i madh dhe janë të etur për fitore.

Ndeshja Kosovë-Norvegji zhvillohet sonte nga ora 19:00 në palestrën “Minatori” të Mitrovicës.