Kompania “Pastrimi” nis shpërndarjen e 300 kontejnerëve të mbeturinave, procesi i prodhimit ishte ideuar nga drejtori dhe nënkryetarja e shkarkuar

Kompania Rajonale e Mbeturinave “Pastrimi” ka njoftuar të premten se është finalizuar faza e parë e projektit për prodhimin e 300 kontejnerëve.

Sipas njoftimit, procesi i prodhimit të këtyre kontejnerëve është ideuar në nëntor të vitit të kaluar, në bashkëpunim me nënkryetaren Donjeta Sahatçiu dhe drejtorin e Shërbimeve Publike, Ilirik Musliu – të dy tashmë të shkarkuar nga kryetari i Prishtinës, Përparim Rama.

“Procesi i prodhimit të kontejnerëve u ideua dhe u fillua në nëntor 2023 në bashkëpunim me nënkryetaren znj. Donjeta Sahatçiu dhe Drejtorin e Shërbimeve Publike z. Ilirik Musliu si nevojë që në Kryeqytet të rrisim numrin e kontejnerëve për shkak të mungesës së madhe dhe e cila ka ndikuar edhe në shërbimin cilësor”, thuhet në komunikatën për media.

Lexo po ashtu Anulimi i vendimit për pronat në Badovc, prishja e koalicionit LDK-PDK në Prishtinë dhe deklaratat – gjithçka nga seanca e kuvendit komunal

Tutje, nga KRM “Pastrimi” kanë bërë të ditur se përmes këtij projekti është arritur që me kosto të ulët të kursehet edhe buxheti i kompanisë dhe “njëherit të ndihmojmë komunën në shtimin e numrit të tyre dhe e cila pritet të ndikoj dukshëm në ngritje të cilësisë”.

“Menjëherë po e fillojmë shpërndarjen e tyre në lagje te ndryshme të kryeqytetit. Kemi nisur edhe marrëveshjen e re me Ndërmarrjen Publike Banesore për prodhimin edhe të 1000 kontejnerëve të rinj”, thuhet mes tjerash në njoftim.

Kryetari i Komunës së Prishtinës, Përparim Rama, ka marrë vendim për ristrukturim të kabinetit qeverisës të kryeqytetit. Ai ka shkarkuar nënkryetaren Donjeta Sahatçiu, e cila vjen nga radhët e Partisë Demokratike të Kosovës. Ka thënë se shkarkimi i Sahatçiut lidhet me ngecjet në fushën e digjitalizimit.

Paraprakisht, Rama ka liruar nga detyra drejtorin e Shërbimeve Publike, Ilirik Musliu, i cili po ashtu vjen nga PDK-ja. Këtë vendim ai e ka arsyetuar me situatën alarmante me mbeturina në kryeqytet.

Pas këtyre vendimeve, PDK të enjten njoftoi se ka prishur koalicionin qeverisës me Lidhjen Demokratike të Kosovës. /Telegrafi/