Komisioni i Venedikut do të vendosë për dygjuhësinë në kartëmonedha dhe uniforma

Komisioni i Venedikut do ta thotë fjalën e fundit për çështjen e dygjuhësisë te kartëmonedhat dhe simbolet, gjegjësisht për atë se a do të jenë këto dy elemente pjesë përbërëse e Ligjit për gjuhën shqipe, përcjell Telegrafi Maqedoni.

Kjo do të jetë mënyra përfundimtare e zgjidhjes së çështjes më të ndjeshme ndërmjet partnerëve të koalicionit, e cila edhe më tej mbetet çështje me potencial për destabilizim të vetë qeverisë në rast të mosrealizimit brenda 100 ditëve të para të qeverisjes.

Sipas burimeve qeveritare, kompromisi qëndron në atë se ligji pa pjesët diskutabile dhe me sa duket të paparanueshme për LSDM-në do të kalojë që nesër në miratim të Qeverisë, ndërsa më pas do të dërgohet me pjesët shtesë deri te Komisioni i Vendekiut, prej ku, në rast se merret dritë e gjelbërt, do të kthehet për plotësime në mbledhje të Qeverisë.

Pikërisht pozitat e ndryshme të partnerëve qeveritar në lidhje me atë se a duhet vetëm pikat e kontestueshme të ligjit ose i tërë ligji të shkojë te Komisioni i Venedikut ishin shkaku i mos miratimit të Ligjit për gjuhën shqipe në mbledhjen e Qeverisë ditën e hënë, por nga Qeveria informojnë se Ligji në fjalë duhet të përpunohet rreth gjobave të inspekcioneve në rast të mos aplikimit të ligjit./Telegrafi/