Në sulmet izraelite në Rripin e Gazës që nga mëngjesi i sotëm janë vrarë 57 palestinezë, kanë konfirmuar burime mjekësore për Al Jazeera Arabic.

Në një sulm izraelit ndaj një objekti mjekësor të UNRWA-s në kampin e refugjatëve Jabalia, janë vrarë të paktën 22 persona, përfshirë gra dhe fëmijë, ka njoftuar Zyra për Media e Qeverisë së Gazës.

"Ne e dënojmë ashpër vazhdimin e gjenocidit nga okupimi izraelit ndaj civilëve dhe njerëzve të zhvendosur. Dënojmë këtë sulm barbar që synoi me qëllim institucionet mjekësore dhe zonat humanitare", thuhet në deklaratë.

Gjithashtu, theksohet se Izraeli ka shënjestruar 228 strehimore për civilë që nga fillimi i luftës, duke shkelur në mënyrë të dukshme të gjitha normat ndërkombëtare që mbrojnë civilët në konflikt.

Organizatat humanitare ndërkombëtare që operojnë në Gaza paralajmërojnë se popullsia nuk mund të përballojë mungesën e mëtejshme të ndihmave humanitare, pasi bllokada izraelite, e cila ka zgjatur për më shumë se një muaj, po e mbyt këtë territor palestinez.

"U ngrita në mëngjes për të blerë bukë për fëmijët e mi, por i gjeta të gjitha furrat të mbyllura", tha Mahmud Khalil nga qyteti i Gazës.

Banorët frikësohen se rreziku i urisë do ta godasë edhe një herë Gazën.

"Çmimi i miellit është rritur... dhe ne nuk mund ta përballojmë. Kemi frikë nga uria që kemi përjetuar më parë në jug", thanë disa banorë.

Që nga fillimi i luftës më 7 tetor 2023, të paktën 50.423 palestinezë janë vrarë dhe 114.638 janë plagosur në Gaza, sipas Ministrisë së Shëndetësisë së enklavës.

Në 24 orët e fundit, në spitalet e Gazës kanë mbërritur trupat e 24 personave, ndërsa 55 të plagosur janë trajtuar. /Telegrafi/

AziaNga BotaBotë