Izraeli dhe Kosova zyrtarizojnë heqjen e vizave për qytetarët kosovarë, sot nënshkruhet marrëveshja

Izraeli dhe Kosova do të shënojnë edhe një hap tjetër të rëndësishëm në marrëdhëniet mes dy vendeve, duke nënshkruar marrëveshjen për hyrjen në fuqi të vendimit për heqjen e vizave për kosovarët.

Kështu është bërë e ditur në një njoftim nga ambasada e Izraelit në Prishtinë, ku është theksuar se ceremonia e nënshkrimit të kësaj marrëveshje do të bëhet sot në orën 18:00.

“Kemi kënaqësinë t’ju ftojmë në pritjen e nesërme të organizuar nga Shkëlqesia e Saj znj. Tamar Ziv, Ambasadore e Shtetit të Izraelit në Republikën e Kosovës, me ç’rast do ta shënojmë Ditën e Pavarësisë së Izraelit dhe Marrëveshjen për Heqjen e Vizave për shtetasit kosovarë”, thuhet në njoftim.

Lexo po ashtu Izraeli i heq vizat për qytetarët e Kosovës

Ndryshe më 29 janar të këtij vitit, presidentja Vjosa Osmani kishte njoftuar se Izraeli është pajtuar për heqjen e vizave për qytetarët e Kosovës.

Osmani kishte bërë të ditur se ministritë përkatëse kishin nisur procedurat për formalizimin e marrëveshjes, dhe se qytetarët e Kosovës do të kenë mundësinë të udhëtojnë lirshëm në një nga destinacionet më të njohura turistike në rajon dhe më gjerë.

Ky vendim i Izraelit vjen pas njohjes së pavarësisë së Kosovës më 4 shtator 2020. /Telegrafi/