Isufi: Gjasat janë që Qeveria ta përfundojë mandatin me përbërjen aktuale

Nënkryetari i AAK-së, Ahmet Isufi, që njëherësh është shef i deputetëve të kësaj partie, ka thënë se siç po duken gjërat Qeveria Haradinaj do ta çojë mandatin deri në fund.

Isufi, në “Debat Plus” me Ermal Pandurin në RTV Dukagjini, ka thënë se që nga dita kur është formuar Qeveria ka pasur zëra se ajo do të bie.

“Kanë kaluar dy vite ndërsa Qeveria është duke vepruar. Nuka ka gjasa që ajo të rrëzohet pasi konstalacioni i forcave politike në Kosovë në gjendjen ekzistuese nuk është as për së afërmi për të ofruar një mocion mosbesimi ndaj Qeverisë”, tha ai, përcjell Telegrafi.

Nënkryetari i AAK-së thotë se njëra parti e opozitës ka zgjedhjet e brendshme dhe po merret me problemet e veta ndërsa tjetra ka pasur një ndarje dhe ka nevojë për një konsolidim.

“Partitë në pushtet normalisht kanë nevojë që të vazhdojnë qeverisjen pasi janë shumë vendime që janë marrë e ka edhe të tjera që pritet të merren dhe që janë në rrugë e sipër”.

Kryetari i Grupit Parlamentar të AAK-ë ka thënë se gjasat janë që Qeveria do ta përfundojë mandatin me këtë konstalacion të forcave politike që janë momentalisht në pushtet./Telegrafi/