IPKO ka mirëpritur kryetarin e Odës Ekonomike të Kosovës dhe kryetarin e Odës Ekonomike Amerikane

Drejtori i Departamentit të shitjes të IPKO-së Arianit Duraku, i ka njoftuar kryetarët e të dy odave ekonomike, Berat Rukiqin dhe Arian Zekën, me sfidat me të cilat po përballet IPKO në fushën e të bërit biznes gjatë kohës së pandemisë. Pavarësisht sfidave në tregun kosovar, si rrjedhojë e  masave të ndërmarra nga Qeveria e Republikës së Kosovës dhe mjedisit aktual biznesor, IPKO ka themeluar menjëherë grupin e rimëkëmbjes së biznesit dhe janë marrë të gjitha masat e duhura, në mënyrë që biznesi të operoj pa ndërprerje dhe që rrjedhimisht klientët e kompanisë të kenë shërbime të pandërprera për të përballuar sa më lehtë gjendjen e krijuar, veprime këto të cilat janë aplikuar gjithmonë duke respektuar masat e rekomanduara nga institucionet përkatëse.

Për më shumë, Rukiqi dhe Zeka, janë njoftuar me organizimin e punës gjatë kësaj periudhe, përkushtimin dhe adaptimin e IPKO, në rrethanat e reja të krijuara, dhe kanë parë nga afër punën e kompanisë duke vizituar Qendrën e Rrjetit dhe Monitorimit si dhe Dhomat e Serverëve.

Rukiqi dhe Zeka kanë shprehur mirënjohjen e tyre ndaj kompanisë për mënyrën e operimit dhe adaptimin e punës në këtë kohë pandemie, gjithmonë duke ju ofruar shërbimet më cilësore klientëve në gjithë territorin e Kosovës.

Njëkohësisht, edhe drejtori ekzekutiv i IPKO-s, Robert Erzin përmes video konferencës falënderoi të dy kryetarët për vizitën, interesimin dhe përkrahjen e tyre të vazhdueshme që bëjnë për kompaninë IPKO si dhe kompanitë tjera që operojnë në tregun kosovar, veçanërisht gjatë kësaj periudhe e cila natyrisht se ka sjell vështirësi të shumta ekonomike, temë kjo që u diskutua gjatë takimit së bashku me mënyrën se si mund të evitohen të njëjtat në të ardhmen.

Funksionimi i rregullt i kompanisë gjatë kësaj kohe të pandemisë është shumë i vështirë, gjithmonë duke pasur parasysh faktin që të gjitha shpenzimet operacionale vazhdojnë të jenë të njëjtat. Por, për më tepër, IPKO është përballur edhe me një diskriminim shtesë si rrjedhojë e Vendimit të Qeverisë së Kosovës, me Nr.05/21 i datës 02.04.2020, përmes së cilit IPKO’s i mohohet e drejta për ofrim të shërbimeve të telekomunikimit për të gjitha Institucionet e Kosovës. Andaj, përfaqësuesit e IPKO’s, kanë kërkuar mbështetje nga dy Odat Ekonomike në këtë drejtim, në mënyrë që të mbrohet sektori privat, e mbi të gjitha investimet e huaja në Kosovë.

Gjithsesi, përkundër të gjitha sfidave, IPKO vazhdon të jetë investitori më i madh i huaj në Kosovë, ku deri më sot janë investuar 320 milionë euro, duke punësuar më shumë se 600 punëtorë të rregullt si dhe 3000 kontraktorë dhe distributorë në gjithë Kosovën.