Skuadra italiane Inter tregoi edhe një herë pse është një nga favoritët për të shkuar larg në këtë edicion të Ligës së Kampionëve, duke mposhtur me rezultat të pastër 3-0 ekipin çek të Slavia Pragës, në kuadër të xhiros së dytë të fazës së grupeve.
Ndeshja nisi me një ritëm të lartë dhe presioni i vendasve dha frytet në minutën e 30-të. Lautaro Martinez përfitoi nga një gabim trashanik i portierit të Slavia Pragës, duke e ndëshkuar me një goditje të saktë nga distanca për rezultatin 1-0.
Vetëm katër minuta më vonë, Interi dyfishoi epërsinë. Marcus Thuram bëri një aksion të bukur dhe asistoi për Denzel Dumfries, i cili e kishte të lehtë të shtynte topin në rrjetë me portën bosh.
Pas pushimit, Slavia u përpoq të rikthehej në lojë me disa zëvendësime të hershme, por pa efekt të dukshëm.
Në minutën e 65-të, Alessandro Bastoni asistoi bukur për Lautaro Martinez, i cili shënoi golin e tretë dhe të dytin personal në këtë takim, duke vulosur fitoren 3-0.
Ndeshja u karakterizua edhe me disa kartonë të verdhë, Lautaro Martinez, Yann Bisseck dhe Ivan Schranz u ndëshkuan për ndërhyrje të palejuara.
Me këtë fitore, Interi forcon pozitat në grup dhe dërgon një sinjal të qartë për rivalët se është gati për fazat më të thella të turneut, ndërsa Slavia Prague mbetet me punë për të bërë në ndeshjet e ardhshme./Telegrafi/
