Ideatori i fitores së Ballkanit ndaj La Fiorita, Korenica: Na është rritur besimi dhe motivi, shpresoj të shkojmë në grupe

Meriton Korenica ishte një nga lojtarët më të mirë të Ballkanit në fitoren e thellë të Ballkanit ndaj La Fiorita me rezultat 4-0.

Ai shënoi një herë dhe ishte vendimtar në golin e dytë të Ballkanit, që tashmë me këtë fitore komode mendon për raundin e tretë kualifikues të Ligës së Konferencës.

Mesfushori ka folur për rëndësinë e fitores, duke thënë se i jep qetësi skuadrës.

“Një fitore shumë e rëndësishme për neve. E mira që vjen që në ndeshjen e parë. Në letër ndoshta ishim ne favorit, por në fushë nuk i dihet kurrë. Kjo fitore e parë na jep sa do pak një qetësi për ndeshjen tjetër”, ka thënë Korenica për Telegrafin.

Ai është shumë i lumtur me paraqitjen e tij, golin dhe ndihmë që i dha skuadrës.

“Ka qenë një paraqitje e mirë e imja, por paraqitje fantastike kishte edhe i gjithë ekipi. Mundohem gjithmonë të jap maksimumin dhe t’i kryej ato detyra që më jep trajneri”, deklaroi ‘Kore’.

Korenica dhe Ballkani duan të bëjë rrugë sa më të gjatë në Evropë dhe për këtë kanë besim, pasi skuadra është e mirë dhe trajneri ka përvojë në këto gara.

“Pas një eliminimit që mund të them erdhi pasi nuk kishim edhe aq fat në Ligën e Kampionëve, tani ekipi është më shumë i motivuar. Duam që të kalojmë sa më shumë raunde që mundemi në Ligën e Konferencës. Kjo fitore na ka dhënë edhe më shumë motiv dhe shpresoj qe te shkojmë deri në grupe të Ligës së Konferencës”, përfundoi Korenica.

Në raundin e tretë vetëm nëse nuk ndodh ndonjë super befasi, Ballkani do të takohet me fituesin e çiftit Sutjeska – Klaksvik. /Telegrafi/