Lajme Kosovë Politikë

Humbi garën për kryetar të Junikut, Kuçi jep dorëheqje nga posti i kryetarit të Degës së AAK-së

Para 3 vitesh

Kryetari i deritashëm i Komunës së Junikut, Agron Kuçi, pas humbjes së garës në balotazh për edhe një mandat në krye të komunës, ka dhënë dorëheqje edhe nga posti i kryetarit të Degës së AAK-së në këtë komunë.

Kuçi, përmes një postimi në Facebook, pas ia ka falënderuar votuesit, ka thënë se rezultati në zgjedhje është përgjegjësi e tij, prandaj ka dhënë dorëheqje të parevokueshme nga pozita e kryetarit të Degës së AAK- së.

“Rezultati në zgjedhje, ekskluzivisht është përgjegjësi e imja dhe e askujt tjetër prandaj i vetëdijshëm për këtë, unë jap dorëheqje të parevokueshme nga pozita e kryetarit të Degës së AAK- së, me qëllimin më të mirë që Dega të drejtohet nga një frymë e Re, e që jam i bindur se Degës sonë në Junik nuk i mungon, përkundrazi potenciali që e kemi ngritur bashkarisht është shumë i madh dhe qëndron në lartësinë e duhur”, ka shkruar Kuçi, transmeton Telegrafi.

Postimi i plotë i Kuçit:

“Të dashur qytetarë të Junikut,

Bashkëvendas të respektuar!

Më lejoni që fillimisht të ju falënderoj për besimin që keni treguar me vite të tëra, në radhë të parë ndaj Aleancës për Ardhmërinë e Kosovës dhe mua si kryetar i Degës dhe kryetar i Komunës për 12 vjet me radhë, duke na bërë fitues (zgjedhje lokale dhe nacionale) në më shumë se 9 procese zgjedhore, pra, që nga viti 2009 e tutje!

Natyrisht se kjo besnikëri dhe punë e palodhshme e juaja e përshkuar me ndershmërinë më të lartë meriton konsideratën dhe respektin e përjetshëm. Prandaj nuk hezitoj ta them hapur se për të gjitha sukseset e arritura sot e 12 vjet për ta bërë Junikun tonë më të mirë e më të bekuar, ua dedikoj Juve, qytetarë të dashur, sepse e them pa modesti, ju jeni motivi dhe kryefjala e suksesit dhe të arritura të admirueshme të Komunës sonë të Re.

Rezultati i publikuar nga KQZ, tregon që ne nuk kemi fituar në garën për kryetar të Junikut. Ndaj, unë edhe njëherë dua t’i falenderoj nga zemra të gjitha strukturat drejtuese të Aleancës për punën dhe angazhimin e jashtëzakonshëm, aktivistët e simpatizantët tonë besnik, dhe gjithë qytetarët junikas, për kulturën e lartë dhe maturinë e treguar përballë një fushate të egër e linçuese ndaj meje dhe familjes sime. Koha ka për të dëshmuar këtë.

Faleminderit që na besuat votën tuaj, duke na konfirmuar edhe kësaj radhe si partia e parë në Junik, përkundër rezultatit në balotazh, të kampit rival, që ishin tri parti në koalicion të përbashkët (LDK, VV dhe PDK) përballë nesh, si parti e vetme!

Rezultati në zgjedhje, ekskluzivisht është përgjegjësi e imja dhe e askujt tjetër prandaj i vetëdijshëm për këtë, unë jap dorëheqje të parevokueshme nga pozita e kryetarit të Degës së AAK- së, me qëllimin më të mirë që Dega të drejtohet nga një frymë e Re, e që jam i bindur se Degës sonë në Junik nuk i mungon, përkundrazi potenciali që e kemi ngritur bashkarisht është shumë i madh dhe qëndron në lartësinë e duhur.

Unë, ju siguroi se do të jemi si gjithnjë bashkë, sonte nesër e përgjithmonë në jetën përditshme, ne punë, në gëzime e hidhërime, dhe në proceset e sfidat e radhës!