Honda blen bateri me 123GWh nga CATL

Kompanitë japoneze dhe veçanërisht Honda, deri tani kanë lëvizur ngadalë drejt hipjes në “trenin” e veturave elektrike, por duket se më në fund gjërat kanë ndryshuar.

Honda sot njoftoi se ata kanë arritur një marrëveshje me CATL , prodhuesin më të madh në botë për bateritë e veturave elektrike, për blerjen e baterive nga ta në të ardhmen.

Kjo marrëveshje e re deklaron se Honda do të blejë bateri me kapacitet 123GWh nga CATL për prodhimin e veturave elektrike, duke filluar nga viti 2024 e deri në vitin 2030, raporton Arena EV, transmeton Telegrafi.

Bateritë në fjalë do të prodhohen në bazën e prodhimit të CATL në Yichun, provincën lindore të Jiangxi në Kinë.

Ato do të përdoren për veturat e Honda të cilat do të shiten në tregun kinez, nga të cilat disa modele veçse se shiten nën emrin e nën-markës së kompanisë “e:N”.

Për shembull, e:NP1 prodhohet nëpërmjet një sipërmarrje të përbashkët me GAC-in kinez. Kjo nuk është një befasi, pasi që Honda Prologue, vetura e parë elektrike e dizajnuar për tregjet perëndimore, është një lloj i prodhimit të një sipërmarrje të përbashkët, pasi që e përdor platformën Ultium të General Motors.

Ideja pas një strategjie të tillë e lejon Honda-n që të vendos një bazament të fortë në “lojën” e veturave elektrike më shpejt sesa do të bënte ndryshe duke prodhuar veturat e saj 100 për qind në fabrikat e saj në Japoni. /Telegrafi/