Me homazhe përkujtohen heronjtë Afrim Zhitia dhe Fahri Fazliu

Kryeministri i Kosovës Ramush Haradinaj dhe kryetari i Kuvendit Kadri Veseli kanë bërë homazhe sot në vendin ku para 28 vitesh kanë rënë heroikisht heronjtë Afrim Zhitia dhe Fahri Fazliu.

Kryeministri i Kosovës, Ramush Haradinaj tha se nderim i përjetshëm u takon heronjve Fahri Fazliu dhe Afrim Zhitia që u flijuan për të mirën e vendit, si dhe familjarëve dhe bashkëluftëtarëve të tyre.

“Nderim i përjetshëm heronjve pra Fahir Fazlis dhe Afrim Zhitisë, nderim po ashtu për të gjallët për prindërit për bashkëluftëtarët edhe besnikërinë në rrugën e lirisë për të cilën janë flijuar më të mirë tanë, pra lavdi e përjetshme”, tha Haradinaj.

Ndërsa, kryetari i Kuvendit Kadri Veseli me rastin e 28 vjetorit të rënies së heronjve Fahri Fazliu dhe Afrim Zhitia tha se të gjithë janë krenar për këta heronj dhe gjeneratat e reja do të përkulen para tyre.

Veseli po ashtu tha se do t’i përkrahin familjarët e Fahri Fazliut dhe Afrim Zhitisë.

“Krenar jemi të gjithë ata që i kemi njohur, personalisht jam shumë krenar, kanë qenë pushkët e para të lirisë kanë qenë paraardhësit e Ushtrisë Çlirimtare të Kosovës, nderohemi, çdo herë kombi jonë do të jetë krenar për ta do të përulet gjenerata e reja para këtyre heronjve të kombit dhe para gjithë heronjve të rënë në luftën për liri, në të njëjtën kohë jemi krenar që edhe familjarët kanë qëndruar edhe në procese më vonë edhe janë shumë të fortë.Do t’i përkrahim bashkarisht dhe në të njëjtën kohë nuk do ta harrojmë atë se sa e shtrenjtë ka qenë liria jonë“, tha Veseli.

Homazhe pranë vendit ku kanë rënë Afrim Zhitia dhe Fahri Fazliu kanë bërë edhe familjarë dhe qytetarë tjerë.

Fahri Fazliu dhe Afrim Zhitia kanë rënë më 2 nëntor të vitit 1989 në lagjen “Bregu i Diellit” pas një rezistence disa orësh me policinë serbe.

Në 28 vjetorin e rënies së tyre homazhe sot janë bërë në vendlindjen e Afrim Zhitisë dhe në Llaushë të Podujevës, vendlindja e Fahri Fazliu.