Hidrologu Kastrati: Reshjet e shiut do të vazhdojnë, por me intensitet më të ulët

Pas reshjeve të dendura të shiut situatë e rëndë është paraqitur në disa komuna të Kosovës. Janë vërshuar disa objekte banimi, si dhe janë bllokuar disa rrugë në Mitrovicë, Pejë, Skenderaj, Deçan, Istog, etj. 

Bashkim Kastrati nga sektori për Hidrologji dhe Prognoza Hidrologjike në Institutin Hidrometeorologjik të Kosovës në një prononcim për Telegrafin ka thënë se situata në terren është e rënduar në disa pjesë të Kosovës për shkak të reshjeve të shiut.

Ai tha se situata më e rënduar paraqitet në Skenderaj, Mitrovicë, Skenderaj, Junik, etj.

Lexo po ashtu Gjendje e rëndë nga vërshimet në disa komuna të Kosovës, autoritetet bëjnë thirrje për kujdes

“Me këtë situatë të re, të prurjeve të lumenjve siç po e shohim dhe faktikisht ashtu siç e kemi parashikuar para dy ditëve ashtu dhe ka ndodhur. Kemi vërshime në disa lumenj në disa pjesë të Kosovës, por situata më e rënduar është në Komunën e Skenderajt, Mitrovicës, Pejës, Junikut, etj”, ka thë ai.

Sipas tij, reshjet e shiut do të vazhdojnë por me intensitet më të ulët.

“Reshjet e shiut do të vazhdojnë me intensitet me të ulët, dhe në disa pjesë do të ndërpriten fare. Por, prapë situata nuk është stabile gjatë këtyre ditëve në vijim”, ka thënë Kastrati.

Ndryshe, siç ka raportuar Telegrafi në disa komuna të Kosovës ka vërshime nga reshjet e shumta të shiut duke shkaktuar bllokim të rrugëve dhe përmbytje të disa shtëpive e banesave. /Telegrafi/