Kryeministri i Shqipërisë, Edi Rama ka ndarë sot me ndjekësit e tij në rrjetet sociale disa foto nga kantieri i ndërtimit të hekurudhës Tiranë-Durrës.
Në një postim në Facebook, Rama tha se puna po vijonë me ritme të larta për të përfunduar në mars të vitit 2024.
Një ditë më parë, zëvendëskryeministrja, njëherësh ministre e Infrastrukturës dhe Energjisë, Belinda Balluku inspektoi punimet për ndërtimin e hekurudhës Tiranë-Durrës, një projekt i mbështetur nga fondet e Bashkimit Evropian.
Balluku informoi se Banka Evropiane për Rindërtim dhe Zhvillim ka dhënë një kredi prej 70 milionë euro, 50 për qind e të cilës është grant dhe pjesa tjetër kredi.
“Ky projekt ka nisur prej kohësh por ka dashur një kohë të gjatë të vihet në jetë, pasi duhen respektuar procedurat. Kjo hekurudhë nuk është thjesht mjet transporti, por krijon një mentalitet të ri të të udhëtuarit që ka të bëjë me sjelljen miqësisht ndaj ambientit duke ulur përdorimin e automjeteve. Kjo është dallëndyshja e parë në industrinë e hekurudhës”, tha Balluku.
Sipas saj, hekurudha është e gjatë 39 km, ku 34 km i përkasin gjurmës ekzistuese Tiranë-Durrës, që po rindërtohet e modernizohet dhe 5 km janë gjurmë e re nga ‘Megatek’ deri në aeroportin e Rinasit.
Balluku tha se distanca nga qendra e Tiranës deri në aeroportin e Rinasit do të përshkohet për vetëm 12 minuta, ndërsa udhëtimi Tiranë-Durrës do të zgjasë 22 minuta. /Telegrafi/
