Haziri: Hovenier foli për Asociacionin për t’ia hequr popullit frikën që Kurti e mbolli

Nënkryetari i Lidhjes Demokratike të Kosovës, Lutfi Haziri, ka komentuar deklaratat e dhëna së fundmi nga ambasadori amerikan, Jeff Hovenier, rreth formimit të Asociacionit të komunave me shumicë serbe.

Haziri ka thënë se ambasadori ka përçuar mesazh te populli i Kosovës, me qëllim të largimit të frikës nga “Zajednica” që Albin Kurti “e mbolli si opozitar”.

“Po debatohet e analizohet se kujt ia adresoi mesazhin ambasadori amerikan, shkëlqesia e tij, Hovennier. Shumë e drejtë, por mesazhi është për popullin e Kosovës, për t’ia larguar frikën nga Zajednica që e mbolli vetë Albin Kurti opozitar! Albini u ba Kryeministër, por frikën që e mbolli, nuk e largoi. Përkundrazi!”, ka shkruar ai në Facebook.

Për Asociacionin Hovenier është deklaruar të enjten në konferencë për media në Prishtinë, ku ka thënë se draft-statuti i prezantuar nga Bashkimi Evropian është në përputhje me Kushtetutën e Kosovës.

Ai po ashtu ka deklaruar se fjalën e fundit për këtë draft duhet ta japë Gjykata Kushtetuese e Kosovës. /Telegrafi/