Haxhiu: Për herë të parë në Kosovë do të kemi Gjykatë Administrative të Specializuar

Ministrja e Drejtësisë, Albulena Haxhiu ka thënë se për herë të parë do të ketë Gjykatë Administrative të Specializuar në vend.

Haxhiu përmes një konference për media pas mbledhjes së Qeverisë tha se një nga reformat që kanë premtuar ka qenë edhe çështja e reformës administrative.

Sipas saj, Gjykata Administrative do t’i trajtojë të gjitha kontestet administrative dhe ato të punës në sektorin publik, transmeton Telegrafi.

“Pas procedimit në Kuvendin e Kosovës të projektligjit për kontestet administrative tani i ka ardh radha dhe Gjykatës Administrative dhe asaj të Punës. Ky koncept dokument i adreson problemet në kontestet gjyqësore dhe administrative dhe kontestet e punës në gjykata.

Lexo po ashtu Haxhiu dorëzon në Qeveri koncept dokumentin për themelimin e Gjykatës Administrative

Për herë të parë në Kosovë do të kemi Gjykata Administrative të Specializuara. Gjykata Administrative do t’i trajtojë të gjithë kontestet administrative dhe ato të punës në sektorin publik. Dhe në anën tjetër divizionet e veçanta do të trajtojnë kontestet e punës të cilat vijnë nga sektori privat. Sektorit privat do t’ju ofrohet ndihmë juridike falas nga shteti”, ka thënë Haxhiu.

Po ashtu ajo theksoi se janë më shumë se 10 mijë lëndë në gjykata.

“Dhe këto marrin më shumë se tri vite për zgjidhjen e tyre deri në formën e prerë dhe prandaj ka lind nevoja për këtë”, ka thënë Haxhiu.

Ministrja po ashtu tha se në mbledhjen e Qeverisë u votua dhe koncept dokumenti për procedurën civile.

“Po ashtu pritet të procedohet dhe kodi civil dhe kodi i procedurës civile. Jemi duke punuar me deputetët e Kuvendit të Kosovës që ky dokument mos të dështojë”, ka thënë ndër të tjera Haxhiu. /Telegrafi/