Haxhiu kërkon dorëheqjen e Dërgutit nga Kryesia e Kuvendit

Deputetja Albulena Haxhiu nga Lëvizja Vetëvendosje ka kërkuar që Aida Dërguti, e cila ishte caktuar anëtare e Kryesisë së Kuvendit të Kosovës derisa ishte në Vetëvendosje, ta lirojë këtë post pasi më nuk e përfaqëson partinë e Albin Kurtit.

“Në emër të grupit parlamentar unë sot kërkova që zonja Dërguti që është anëtare kryesisë që deri tani e ka përfaqësuar LVV-në të dorëhiqet, sepse nuk e përfaqëson më LVV-në, ose ne qysh nesër do të vazhdojmë me procedurat për shkarkimin e saj që do duhej ta bënte Kuvendi i Kosovës. Për mua mbetet e pakuptimtë që të vazhdojë të mbetet anëtare e Kryesisë, për sa kohë nuk përfaqëson Vetëvendosjen, nuk përfaqëson vullnetin politik të deputetëve të LVV-së dhe po të kishte moral në politikë sigurisht që Dërguti do duhej të dorëhiqej nga kjo pozitë që mbanë në emër të VV-së dhe me votat e qytetarëve që kanë votuar VV-në. Unë sot nuk pash ende në sqarim, se pse ende nuk është dorëhequr nga detyra që ka. Nëse nuk dorëhiqet ne do të kërkojmë shkarkimin e saj”, tha Haxhiu.

Gjatë ditës Grupi i Pavarur i Deputetëve ka dërguar kërkesë në administratën e Kuvendit për formimin e Grupit Parlamentar prej 12 deputetësh.

Në mbledhjen e Kryesisë u bë e ditur gjithashtu, edhe për përfaqësimin që do të ketë ky grup në organet e Kuvendit dhe të drejtat që gëzon konform rregullores së Kuvendit. ​/Telegrafi/