Hasanaj nga Let’s Do It Kosova: Mjedisi ndotet kryesisht nga faktori njeri dhe kompanitë ndërtuese

Luan Hasanaj nga Let’s Do It-Ta pastrojmë Kosovën ka treguar se vitin që  kemi lënë pas organizata e tij ka kryer disa aksione të pastrimit si dhe mbjellje drunjsh.

Hasanaj në një prononcim për Telegrafin ka thënë se mjedisi në Kosovë ndotet kryesisht nga faktori njeri dhe kompanitë ndërtuese.

“ Let’s Do It-Ta Pastrojmë Kosovën gjatë vitit që lamë pas ka realizuar aktivitete të vazhdueshme mjedisore: aksione pastrimi, mbjellje drunjsh, vendosje shportash, trajnime, monitorimin e zbatimit të udhëzimit administrativ për ndëshkimet me gjoba mandatore, kemi themeluar rrjetin e ambientalistëve ‘We Are One’, si dhe kemi organizuar aktivitete të rregullta tjera vetëdijesuese në rrjete sociale dhe media. Ndotja e mjedisit në Kosovë rrezikohet kryesisht nga faktori njeri, kompanitë ndërtuese, biznese të ndryshme, mungesa e investimeve në projekte mjedisore si dhe nga mos zbatimi i ligjeve nga ana e institucioneve”, ka thënë ai.

Në Kosovë siç tha Hasanaj ekzistojnë mbi 1,000 deponi ilegale të mbeturinave të cilat kryesisht krijohen nëpër prona publike dhe lumenj.

Hasanaj po ashtu tha se: “Zgjidhja e problemeve të ndotjes së mjedisit nuk mund të bëhet përderisa mungojnë investimet në projekte mjedisore, përmirësim i kushteve të kompanive të pastrimit, si dhe hartimi i politikave të cilat i mbështesin bizneset të cilat do të fillonin riciklimin e mbeturinave”. /Telegrafi/

Fotografi të bëra nga Let’s Do It Kosova