Besar Halimi ka lënë mbrapa lëndimin e pësuar javë më parë me skuadrën e tij Brondby.
Mesfushori fantastik i Përfaqësueses së Kosovës ka luajtur ndeshjen e parë të këtij viti ndaj Aalborgut.
Brondby arriti të fitonte me rezultat të thellë 0-3 në udhëtim, ndërsa Halimi luajti 10 minutat e fundit.
Ai ka shkruar në faqen e tij zyrtare se ndihet i lumtur që ka lënë mbrapa lëndimin e pësuar.
“Shumë i lumtur për fitoren kundër Aalborgut. Është një ndjenjë shumë e bukur të kthehem në fushë pas lëndimit”.
“Për më tepër dëshiroj t’i falënderojë tifozët për pritjen e ngrohtë. Ju jeni të pabesueshëm”, ka shkruar mesfushori gjilanas.
Lëndimi i pësuar javë më parë bëri që Halimi të mungonte edhe në dy ndeshjet e Përfaqësueses së Kosovës ndaj Madagaskarit dhe Burkina Fasos.
Pas 27 ndeshjeve në elitën e futbollit danez, Brondby zë pozitën e parë në tabelë me 63 pikë. /Telegrafi/
