Grabovci: Të gjithë e dinë kush qëndron prapa djegies së veturave (Video)

Shefi i Grupit Parlamentar të Partisë Demokratike të Kosovës, ka deklaruar në emisionin “Politikë”, në Tribuna Channel, me Sejdi Demirin se edhe një fëmijë që sapo ka filluar të mendoj e dinë dhe e ka të qartë se kush qëndron prapa aktit të djegies së veturave.

Sipas tij, aktit të djegies së veturave i gëzohen vetëm armiqtë e Kosovës, ata të cilët dëshirojnë ta shohin Kosovën si shtet të dështuar.

“Populli thotë se një katund që shihet s’don kallauz, se kush qëndron prapa këtyre akteve është e fshehtë publike edhe një fëmijë që sa ka nis të mendoj e din dhe e ka shumë të qartë se kush qëndron prapa këtyre akteve”, ka thënë ai.

Grabovci, ka pohuar se cenimi i pronës private është i palejueshëm, madje ai thotë se shumë më e rëndësishme se sa djegia e një veture është mesazhi dhe mesazhi që po dërgohet është paralajmërim i rrezikshëm jo vetëm për Kosovën por edhe për qytetarët e saj.

Ai ka thënë se fati i Kosovës dhe i popullit të saj edhe i lidhur përjetësisht me perëndimin, Bashkimin Evropian dhe Shtetet e Bashkuara të Amerikës.

E, sa i përket dërgimit të lëndës në Gjykatë Kushtetuese nga opozita të cilët po e kontestojnë zgjedhjen e Hashim Thaçit president, Grabovci ka thënë se çdo veprim që është demokratik nuk mund askush ta kundërshtojë.

“Çdo veprim që është demokratik, çdo mjet që është demokratik që opozita dëshiron të arrij qëllimet e veta në mënyrë korrekte në mënyrë absolute nuk kam të drejtë as unë ,as kush tjetër t’ia kontestoj dhe të dal kundër. Mirëpo kemi të drejtë dhe obligim të gjithë deputetët pa përjashtim t’i kundërshtojmë mjetet , veprimet e cilit do qoftë, të kujt do qoftë , kurdo qoftë dhe kudo qoftë që manifestohen ti luftojmë ato”, ka deklaruar ai.

Grabovci, ka thënë se në ditën kur Hashim Thaçi është zgjedhur president është respektuar çdo procedurë që parasheh Gjykata Kushtetuese.

“Ne veprimet e Gjykatës Kushtetuese asnjëherë nuk I kemi kontestuar sepse nëse ne nuk I njohim vendimet e Gjykatës atëherë nuk e njohim institucionin tonë më të lartë  që është i thirrur për të bërë interpretim , prandaj atëherë ne nuk e njohim vetveten nuk e njohim shtetin tonë”, ka pohuar Grabovci.