Gjykimi për vrasjen e 15-vjeçarit dhe babait të tij, dëshmitari thotë se deklarata e dhënë në polici s’është tërësisht e vërtetë

Dëshmitari Driton Muja, në seancën e së enjtes në Gjykatën Themelore në Prishtinë, ka thënë se deklarata e tij e dhënë në polici më 5 prill 2021, nuk është tërësisht e vërtetë dhe e mohon në disa pika.

Këtë deklarim, Muja e bëri gjatë dhënies së dëshmisë së tij, në rastin ku Xhafer Bardhi dhe Amir Bardhi akuzohen se si rezultat i një mosmarrëveshje pronësore, kanë privuar nga jeta të miturin A.M (15-vjeçar) dhe prindin e tij B.M.

Dëshmitari Muja, i pyetur nga prokurori Bashkim Zeqaj se përveç që ka dëgjuar krismat e armës, a e ka parë se kush ka shkrepur armën, u përgjigj se nuk e ka parë.

Lidhur me këtë, mbrojtësi i të akuzuarit Xhafer, avokati Haxhi Millaku e pyeti se përse në deklaratën e dhënë në polici ka deklaruar se Xhaferi ka shtënë në drejtim të tyre, kurse Muja tha se nuk e di se kush e ka shkrepur armën dhe se gjatë dhënies së asaj deklarate ka qenë jo i vetëdijshëm.

Muja, deklaroi se në natën kritike të akuzuarit i ka identifikuar pasi që të njëjtit kishin pasur drita në kokë dhe sipas tij ata kanë shkrepur armën pa asnjë komunikim dhe menjëherë janë larguar nga vendi i ngjarjes.

I pyetur nga anëtarja e trupit gjykues, gjykatësja Medie Bytyqi se a ka pasur ndonjë komunikim me të akuzuarit para shkrepjes së armës, pasi që në deklaratën në polici kishte thënë se Xhaferi ka sharë, Muja u përgjigj se nuk i ka dëgjuar duke sharë.

Po ashtu, duke u përgjigjur në pyetjet e prokurorit Zeqaj, dëshmitari Muja tha se Amirin e ka pasur 9 vite në klasë dhe kanë vazhduar shoqërinë edhe në shkollë të mesme.

“Kurrë s’jena dalë pa njëri-tjetrin”, shtoi Muja.

Anëtari i trupit gjykues, gjykatësi Ngadhnjim Arrni, e pyeti dëshmitarin nëse në deklaratën e tij të dhënë në polici të cilën edhe e lexoi kryetari i trupit gjykues, gjykatësi Agim Kuçi, ka ndonjë pjesë të vërtetë, kurse Muja u përgjigj se diçka ka të vërtetë, por nuk i kujtohet se çka.

Ndërkaq, dëshmitari deklaroi se kur ka dëgjuar dy të shtëna, i ka humbur vetëdija deri në momentin kur e kanë zgjuar familjarët.

Seancat e radhës për këtë çështje pritet të mbahen më 1 dhe 7 shkurt 2023.

Sipas aktakuzës së përpiluar më 28 shkurt 2022, nga Prokuroria Themelore në Prishtinë, të pandehurit Xhafer Bardhi dhe Amir Bardhi po akuzohen se më 5 prill 2021 në vendin e quajtur “Zabel” në pyllin e fshatit Gradicë, për shkak të një mosmarrëveshje pronësore rreth së drejtës së shfrytëzimit të malit, me dashje të pandehurit Bardhi në bashkëkryerje kanë privuar nga jeta të miturin- tani të ndjerin A.M 15-vjeçar dhe prindin e tij B.M.

Aktakuza thotë se të njëjtit kanë vënë në rrezik dhe jetën e personave tjerë, të dëmtuarave Valdrin, Valmir dhe Driton Muja, në atë mënyrë që derisa i pandehuri Amir Bardhi ka qenë duke ecur rrugës së malit bashkë me djalin e axhës së tij, dëshmitarin Fisnik Bardhi, aty takohen me të dëmtuarin Valdrin Muja, i cili ka shkuar nga mali, vendi ku ka qenë duke prerë drunj, për ta marrë traktorin dhe për të ngarkuar drunjtë të cilat kanë qenë duke i prerë në mal.

Më pas, aktakuza thotë se Amiri e ka pyetur Valdrinin se “çka jeni duke bërë” dhe se i njëjti i tregon se janë duke prerë drunj në mal dhe më pas i dëmtuari Valdrin vazhdon rrugën në drejtim të vendit ku kanë qenë duke prerë drunjtë, ndërsa Amiri dhe Fisniku po ashtu ndahen.

Tutje, në aktakuzë thuhet se i pandehuri Amiri nëpërmjet telefonit e njofton të pandehurin Xhafer se të dëmtuarit janë duke prerë drunj në mal të cilët bisedojnë për 62 sekonda.

I pandehuri Xhafer i cili ka qenë në shtëpi, thuhet se i merr dy drita për ndriçim të cilat vendosen në kokë, merr armën-pushkën e gjuetisë dhe niset më veturën e tipit “Golf 2” e rrugës bëhen bashkë të dy të pandehurit dhe vazhdojnë në drejtimi të vendit ku të dëmtuarit kanë qenë duke prerë drunj.

Aty, i pandehuri Amir thuhet se ka kontribuar në kryerjen e veprës penale, duke ndriçuar me njërën dritë për të krijuar mundësinë për gjuajte të pandehurit Xhafer, e po ashtu edhe i pandehuri Xhafer ka ndriçuar me njërën dritë dhe menjëherë ky i fundit ka shtënë me armë në drejtim të të dëmtuarit tani të ndjerit A.M i cili në atë moment bërtet “babë më rroki”.

Pastaj, kur i ndjeri B.M dhe i dëmtuari Valdrin shkojnë në drejtim të A.M për t’i dhënë ndihmë, atëherë thuhet se i pandehuri Xhafer prapë shkrep dhe e qëllon tani të ndjerin B.M në kokë, ku më pas i thotë të pandehurit Amir “ikim bir se u bo m**”.

Aktakuza thotë se në vendin e ngjarjes janë gjetur 16 gëzhoja të vogla me të cilat i kanë rrezikuar edhe të dëmtuarit Valdrin, Valmir dhe Driton Muja, të cilët kanë qenë prezent duke prerë dhe bartur drunj, ku këta dy të fundit janë alivanosur pas dy të shtënave.

Gjithnjë sipas aktakuzës, për të ndjerin A.M në Qendrën e Mjekësisë Familjare në Drenas konstatohet vdekja e tij, ku vdekja e tij është e dhunshme dhe ka ardhur si rrjedhojë e gjakderdhjes masive të brendshme dhe të jashtme si pasojë e veprimit dinamik të predhave të hedhura nga arma e gjuetisë.

Ndërsa, i ndjeri B.M pëson lëndime të rënda trupore ku më 15 prill 2021 ndërron jetë në QKUK edhe ai si pasojë e plagëve vdekjeprurëse.

Me këtë, të pandehurit Bardhi akuzohen se në bashkëkryerje kanë kryer veprën penale “Vrasje e rëndë” nga neni 173, paragrafi 1, pika 1.1, 1.5 dhe 1.11 lidhur me nenin 31 të Kodit Penal të Republikës së Kosovës.

Kurse, sipas dispozitivit të dytë të kësaj akuze, i pandehuri Xhafer në kundërshtim me ligjin e zbatueshëm lidhur me armë të tilla ka pasur në posedim armën-pushkën e gjuetisë të cilën e ka punuar vetë.

E me këtë, i pandehuri Xhafer Bardhi akuzohet edhe për veprën penale “Mbajtja në pronësi, kontroll ose posedim të paautorizuar të armëve” nga neni 366, paragrafi 1 të KPRK-së, raporton betimiperdrejtesi.