​Gjini: Të gjithë të ri-testuarit dalin negativë në coronavirus, aktualisht nuk kemi asnjë të infektuar

Kryetari i Komunës së Gjakovës, Ardian Gjini, ka bërë të ditur se të gjithë personat e ri-testuar nga kjo komunë kanë dalë negativë me COVID-19.

Gjini ka thënë se në Komunën e Gjakovës  aktualisht nuk ka asnjë të infektuar me coronavirus, transmeton Telegrafi.

“Sipas informatës së fundit, të gjithë personat e ritestuar nga komuna e Gjakovës kanë dalur negativ ndaj COVID-19. Kjo do të thotë se aktualisht në komunën tonë nuk ka të infektuar. Ky është lajm shumë i mirë për Gjakovën dhe të gjitha institucionet dhe individët e përfshirë në menaxhimin e pandemisë meritojnë lëvdata dhe falënderime”, ka shkruar Gjini në Facebook.

Lexo po ashtu Lajm i mirë, sot 87 persona të shëruar dhe vetëm një i infektuar me coronavirus

Ai ka bërë thirrje që qytetarët të respektojnë rregullat, dhe të shpallet fitorja ndaj pandemisë.

“Po ashtu, të gjithë ish të infektuarit meritojnë falënderim dhe respekt për disiplinën dhe vetëdijen e lartë qytetare që e kanë treguar në mbrojtje të të afërmve dhe bashkqytetarëve tjerë nga infektimi i mundshëm.  Sidoqoftë, sonte nuk mund të shpallim fitore. Në Kosovë, në rajon dhe në botë virusi ende qarkullon dhe ende ekziston mundësia e infektimit dhe e ri-përhapjes së coronavirusit.  Prandaj duhet të vetpërmbahemi dhe t’i respektojmë rregullat në vazhdimësi. Nëse do të jemi të disiplinuar, shumë shpejt mund ta shpallim fitoren kundër pandemisë”, vijon shkrimi i tij./Telegrafi/