Gjermania përgëzon Kosovën pas hyrjes në fuqi të marrëveshjes energjetike ndërmjet ENTSO-E dhe KOSTT

Ambasada e Gjermanisë në Kosovë ka përshëndetur hyrjen në fuqi të marrëveshjes energjetike ndërmjet Rrjetit Evropian të Operatorëve të Sistemit të Transmisionit (ENTSO-E) dhe Operatorit të Sistemit, Transmisionit dhe Tregut të Energjisë Elektrike (KOSTT).

Sipas ambasadës, kjo është një moment historik për Kosovën dhe për bashkëpunimin rajonal.

“Ambasada gjermane përgëzon KOSTT-in dhe Qeverinë e Kosovës për hyrjen në fuqi të Marrëveshjes së Lidhjes me Rrjetin Evropian të Operatorëve të Sistemit të Transmetimit (ENTSO-E). Marrëveshja më në fund mundëson krijimin e një zone të pavarur të kontrollit për Kosovën – kjo është një moment historik për Kosovën dhe për bashkëpunimin rajonal”, thuhet në njoftimin e ambasadës, përcjell Telegrafi.

Po ashtu, kryeministri i Kosovës, Avdullah Hoti, ditë më parë kishte njoftuar se ka hyrë në fuqi kjo marrëveshje që mundëson pavarësimin energjetik të vendit.

Lexo po ashtu Hoti njofton se po hyn në fuqi marrëveshja për pavarësimin energjetik të Kosovës

Ndryshe, rreth pesë muaj më parë, atëherë ministrja në detyrë e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike (MEPTINIS), Rozeta Hajdari ka bërë të ditur se kishte përfunduar procesi i votimit për marrëveshjen e re ndërmjet KOSTT dhe ENTSO-E, me të cilën, sipas saj, vendi ynë fiton pavarësi energjetike. /Telegrafi/