Gjendjet serioze me të cilat mund ta ngatërroni urthin

Urthi është diçka që mundon miliona njerëz çdo ditë. Ndodh kur muskuli që lejon ushqimin të rrjedhë nga ezofagu në lukth nuk funksionon siç duhet.

Acidi i lukthit arrin të depërtojë në ezofag, ku shkakton irritim. Për fat të mirë, urthi zakonisht është i padëmshëm dhe largohet brenda pak orësh – duke mos shkaktuar asgjë më shumë se një ndjesi të dhimbshme.

Zakonisht është rezultat i ngrënies së disa ushqimeve ose thjesht teprimit me ushqim. Megjithatë, ndonjëherë, mund të tregojë diçka më serioze që duhet të hetohet nga mjekët.

Lexo po ashtu Simptomat më pak të njohura që tregojnë kancerin e ezofagut e që shfaqen gjatë ngrënies

Kanceri i laringut dhe ezofagut

Kur acidi i lukthit kthehet në ezofag, mund të shkaktojë dëmtim të indeve që mund të çojë në zhvillimin e adenokarcinomës së ezofagut.

Sipas Linas Venclauskas, kirurg bariatrik në Klinikën Nordbariatric, pavarësisht se urthi nuk është drejtpërdrejt kërcënues për jetën, mund ta dëmtojë ndjeshëm cilësinë e jetës së një personi.

“Nëse nuk trajtohet, mund të çojë në ezofagun Barrett, një sëmundje prekanceroze që prek mukozën e ezofagut. Ezofagiti peptik i vazhdueshëm mund të shkaktojë dhëmbëza të ezofagut, duke e bërë të vështirë hyrjen e ushqimit në lukth. Për këtë arsye, njerëzit ankohen për dhimbje të vazhdueshme në gjoks ose siklet në zonën e gjoksit dhe epigastriumit kur hanë”, është shprehur ai.

Sulmi në zemër

Sulmet në zemër mund të ngatërrohen lehtësisht me urthin. Sipas Harvard Health, të dyja gjendjet mund të shkaktojnë dhimbje gjoksi. Rregulli i përgjithshëm është që nëse nuk jeni të sigurt se çfarë po përjetoni, ia vlen gjithmonë të kërkoni ndihmë – transmeton The Sun.

Simptomat më të shpeshta të problemeve të zemrës përfshijnë shtrëngimin, dhimbjen, rrahjet e shpejta të zemrës, lëkurën e butë, dispepsi dhe vjellje. Simptomat kryesore të urthit përfshijnë një dhimbje djegëse në gjoks, një shije të hidhur, dhimbje që përkeqësohet kur shtriheni dhe dhimbje që lëviz në fyt pas një vakti të madh ose pikant.

Lexo po ashtu Urth apo sulm në zemër? Ja kur duhet të kërkoni ndihmë urgjente mjekësore për shkak të dhimbjes së barkut

Hernia hiatale

Hiatus hernia është kur një pjesë e lukthit kalon duke u ngjeshur në pjesën e poshtme të kafazit të kraharorit përmes hapjes (hiatus) në diafragmë. Gjendja zakonisht zbulohet gjatë një ekzaminimi për të përcaktuar shkakun e urthit ose dhimbjes në gjoks.

Është mjaft e shpeshtë te njerëzit mbi 50 vjeç dhe zakonisht nuk ka nevojë për trajtim nëse nuk është shumë e rëndë. Megjithatë, nëse shoqërohet me urth të rregullt, mund të duhet të menaxhohet me ndërhyrje kirurgjike ose medikamente.

Nëse nuk trajtohet, urthi i vazhdueshëm mund të shkaktojë dëmtim afatgjatë në ezofag, gjë që mund të rrisë rrezikun e kancerit të ezofagut.

Ulcera peptike

Kjo ndodh kur acidi në traktin e tretjes gërryen sipërfaqen e brendshme të lukthit ose zorrëve të holla. Acidi mund të krijojë një plagë të hapur të dhimbshme që mund të rrjedhë gjak.

Njerëzit me këtë gjendje shpesh mund ta ngatërrojnë atë me urth. Simptomat janë të ngjashme, ndërsa simptoma e sëmundjes është djegësima/urthi. Simptoma të tjera përfshijnë nauze, të vjella, djegie dhe ndryshim të ngjyrës së jashtëqitjes për shkak të gjakderdhjes.

Edhe pse në shumicën e rasteve kjo nuk do të jetë shumë serioze (duke marrë terapi të përshkruara nga mjeku për t’i lehtësuar simptomat dhe për të shëruar ulcerat), në raste të rralla mund të jenë një urgjencë.

Lexo po ashtu Nëse vuani nga urthi shmangni këto ushqime

Probleme me mushkëritë

Acidi i lukthit mund të hyjë në mushkëritë tuaja, duke shkaktuar probleme të ndryshme të mundshme të frymëmarrjes, sipas qendrës mjekësore Gastroenterology Consultants në San Antonio.

Grumbullimi i acidit mund të shkaktojë acarim ose inflamacion të kordave vokale ose dhimbje të fytit, të cilat mund të shkaktojnë gjëra të padëmshme si kollitje, kongjestion dhe ngjirurit e zërit, thuhet në faqen e tyre të internetit.

Por, nëse acidi thithet në mushkëri, mund të çojë në gjendje më serioze, si astma, laringiti, pneumonia ose fishkëllima.

Kur të kërkoni ndihmë

Në vijim janë tetë shenja – sipas NHS – që nënkuptojnë se duhet të kontaktoni mjekun tuaj:

Djegësima nuk largohet.

Simptomat e urthit bëhen më të rënda ose të shpeshta.

Keni vështirësi ose dhimbje gjatë gëlltitjes.

Urthi ju shkakton të vjella.

Keni humbje të papritur të peshës.

Merrni antacide pa recetë për më shumë se dy javë dhe ende keni simptoma të urthit.

Keni simptoma të urthit edhe pas marrjes së barnave me recetë.

Keni ngjirje zëri ose fishkëllimë gjatë frymëmarrjes.

/Telegrafi/