Gert Behxheti, sulmuesi premtues 17-vjeçar i FC Prishtina U-17, ka marrë një mundësi të madhe në karrierën e tij. Ai është ftuar për një periudhë dyjavore prove te CA Osasuna, një nga klubet më të njohura dhe më stabile në La Liga, kampionatin që prodhon disa nga futbollistët më të mirë në botë.
Ky zhvillim shënon një hap të rëndësishëm për të riun kosovar, i cili me performancat e tij ka arritur të tërheqë vëmendjen e një klubi që garon në njërën nga ligat më elitare të Evropës. Për një futbollist 17-vjeçar, kjo është një mundësi e artë për të treguar potencialin në një nivel shumë më të lartë.
Edhe pse Spanja nuk e njeh Kosovën politikisht, futbolli ka treguar se është mbi kufijtë dhe dallimet diplomatike. Talentë të rinj nga Kosova po gjejnë hapësira gjithnjë e më të mëdha në arenën evropiane, duke dëshmuar se vendi ynë ka një bazë solide lojtarësh me të ardhme të ndritur.
Vetë fakti që Osasuna ka hapur dyert për një lojtar kosovar është një tregues i qartë se futbolli i vendit tonë po fiton respekt dhe po shihet si një burim i rëndësishëm talenti. Ky është një sinjal pozitiv për të gjithë futbollistët e rinj që ëndërrojnë karrierë jashtë vendit.
E ardhmja e Gert Behxhetit mbetet për t’u parë, por ky hap i madh është vetëm fillimi i rrugës së tij drejt niveleve më të larta të futbollit profesionist. Në të njëjtën kohë, është një histori frymëzuese për futbollin kosovar që po dëshmon se është gati të prodhojë yjet e së ardhmes. /Telegrafi/
