Legjenda e futbollit portugez, Luis Figo, ka folur për garën e ardhshme për Topin e Artë, duke lavdëruar disa lojtarë të shquar, ndërkohë që minimizoi rëndësinë e Kupës së Botës për Klube në vlerësimin e përgjithshëm të sezonit të një lojtari.
Duke folur për AS, Figo e bëri të qartë se, ndërsa garat globale të klubeve shtojnë prestigj, ato nuk duhet të ndryshojnë peshoren kur bëhet fjalë për të vendosur se cili është lojtari më i mirë në botë.
“Nuk mendoj se Kupa e Botës për Klube ka ndikim,” deklaroi Figo.
“Ka disa lojtarë që, për shkak të sezonit të tyre, e meritojnë trofeun. Mendimi im është i parëndësishëm; ata që votojnë vendosin. Por më pëlqejnë lojtarë si Lamine Yamaa, Vitinha, i cili ka fituar gjithçka këtë sezon apo Dembele gjithashtu ka bërë shumë mirë. Varet nëse përqendrohesh në performancën individuale apo në titujt e fituar".
Ish-anësori i Real Madridit dhe Barcelonës foli gjithashtu me entuziazëm për bashkatdhetarin e tij Vitinha, i cili ndihmoi Paris Saint-Germain të fitonte një tripletë vendase dhe gjithashtu ngriti Ligën e Kombeve të UEFA-s me Portugalinë.
“Ai është në listë. Ai ka shanse për të fituar, por siç thashë, varet nga kush voton dhe, logjikisht, nga ajo në të cilën përqendrohesh gjatë sezonit”.
Figo foli edhe për formën e Kylian Mbappe, i cili e përfundoi sezonin si golashënuesi më i mirë i La Ligas dhe fitoi Këpucën e Artë Evropiane pas një sezoni të fortë me Real Madridin.
“Në fillim gjërat nuk ishin mirë, por më pas ai bëri mirë. Ai shënoi shumë gola dhe u përshtat me të luajturit te Real Madridi, gjë që është krejtësisht ndryshe nga të luash në një ekip tjetër,” shpjegoi Figo. “Ajo që mund ta përjashtojë atë nga trofetë individualë është mungesa e titujve të mëdhenj kolektivë, por do ta shohim. Ai është gjithmonë në listën e më të mirëve në botë, kjo është e sigurt.”
Me garën për Topin e Artë ende të hapur, komentet e Figos pasqyrojnë një temë të përbashkët midis ish-lojtarëve: qëndrueshmëria, trofetë dhe ndikimi mbeten kriteret kryesore, më shumë sesa turnetë e rinj, më pak të konsoliduar. /Telegrafi/
