Ferrarese: Prioritet kryesor në Kosovë duhet të jetë zhvillimi ekonomik dhe social

Ambasadori i Italisë në Kosovë, Andreas Ferrarese, në shënimin e 70 vjetorit të pavarësisë së Italisë, tha se marrëdhëniet bilaterale ndërmjet Italisë dhe Kosovë nuk kanë qenë asnjëherë më të forta dhe më të thella.

Ai tha se progresi në bashkëpunimin ekonomik ndërmjet Italisë dhe Kosovës tregon se sa e fortë është kjo miqësi.

Sipas tij, tregtia dypalëshe është rreth 300 milionë euro dhe investimet italiane në Kosovë janë duke u përmirësuar, ndërsa thotë se sfidë për pasardhësin e tij do të jetë sjellja e më shumë kompanive italiane dhe promovimi i mëtejshëm i kulturës dhe gjuhës italiane në këtë vend.

Në fjalimin e tij, të mbajtur në këtë organizim, ambasadori Italian tha se në bazë të përvojës së tij të deritashme në Kosovë, e ardhmja e vendit varet nga katër faktorë kryesor. Sipas tij, nëse kosovarët nuk e shohin të ardhmen e tyre në Kosovë, atëherë nuk do të ketë të ardhme as për vetën Kosovën.

“Kosovarët janë kureshtarë për pjesën tjetër të botës dhe kanë të drejtën e dëshirën për të udhëtuar. Megjithatë, në qoftë se ata nuk e shohin të ardhmen e tyre në Kosovë, nuk ka të ardhme për vetë Kosovën. Qeveritarët dhe parlamentarët duhet vënë zhvillimin ekonomik dhe social si një prioritet kryesor, jo vetëm me fjalë por edhe me vepra. Heronjtë e Kosovës moderne janë administratorët e ndershëm, biznesmenët e guximshëm dhe qytetarët që i binden ligjit. Të rinjtë mbajnë barrën e ndërtimit të vendit të tyre. Ata duhet të bëjnë këtë pa shikuar interesat individuale. Kompensimi për përpjekjet e tyre duhet të përfshijë mundësi më të mëdha, paga adekuate, si dhe përmirësimin e kushteve të jetesës. Kosova duhet të vazhdojë të izolojë dhe të pengojë të gjitha format e ekstremizmit, si dhe nxitjet etnike dhe fetare”, tha ai.

Më tej, Ferrarese deklaroi se tri vitet e qëndrimit të tij në Kosovë kanë qenë të mbushura me sfida, por pavarësisht kësaj, ai thotë se ato tri vite kanë qenë të mbushura edhe me kënaqësi.

Ai përmendi misionin e KFOR-it dhe EULEX-it, për të cilët tha se kanë garantuar një periudhë pa aksidente ndëretnike dhe rritje të efektivitetit në përpjekjet kundër krimit të organizuar dhe korrupsionit.

Në fjalimin e tij, ai foli edhe për pavarësimin e Italisë, ku përmendi referendumin që votoi populli Italian më 2 qershor të vitit 1946.

Ai tha se në kohën kur Italia doli nga Lufta e Dytë Botërore, situata ishte e tmerrshme, prandaj është dashur një kohë që vendi të kalonte problemet dhe të arrinte zhvillim në fushën politike dhe atë ekonomike, për çka thotë se do ta arrijë edhe Kosova, pasi që është i bindur se populli i Kosovës do të tregojë të njëjtën vendosmëri dhe këmbëngulje në ndjekjen e rrugës së tij.