Facebook po vë fitimin para së mirës publike, thotë ish-punonjësa Frances Haugen

Një ish-punonjëse e Facebook -ut e ka akuzuar kompaninë se ka vënë “fitimin mbi të mirën publike”, pasi doli përpara si sinjalizuesi që zbuloi një sasi dokumentesh të brendshëm që e kanë vendosur firmën e teknologjisë në krizën e saj më të keqe që nga skandali i Cambridge Analytica.

Sipas mediave të huaja, përcjell Telegrafi, Frances Haugen, 37 vjeçe, tha se mijëra dokumente që ajo kishte mbledhur dhe ndarë me Wall Street Journal dhe zbatimin e ligjit amerikan treguan se kompania po gënjente publikun se po bënte përparim të rëndësishëm kundër urrejtjes, dhunës dhe dezinformatave.

“Gjëja që pashë në Facebook vazhdimisht ishte se kishte konflikte interesi midis asaj që ishte e mirë për publikun dhe asaj që ishte e mirë për Facebook. Dhe Facebook, pa pushim, zgjodhi të optimizohej për interesat e veta, si të fitonte më shumë para”, ka thënë ajo.

Në një intervistë me programin e lajmeve 60 Minutes të dielën, Haugen shpjegoi vendimin e saj për të folur në lidhje me funksionimin e brendshëm të Facebook, duke thënë se ishte alarmuar nga ajo që ajo i perceptonte si politikat e kompanisë që i jepnin përparësi fitimit mbi sigurinë publike.

“Versioni i Facebook që ekziston sot po ndanë shoqëritë tona dhe po shkakton dhunë etnike në të gjithë botën”, citohet më tej ajo.

Haugen tha se ajo u bashkua me Facebook në vitin 2019 si menaxhere produktesh në ekipin e saj të integritetit qytetar – i cili u përqendrua në çështjet që lidhen me zgjedhjet në mbarë botën – pasi kaloi më shumë se një dekadë duke punuar në industrinë e teknologjisë, përfshirë në Pinterest dhe Google.

Ajo tha se ishte dakord të pranonte punën vetëm nëse mund të punonte për të ndihmuar kompaninë të luftonte dezinformatat.

Por Haugen tha se ajo shpejt filloi të ndjente se Facebook nuk ishte i gatshëm të ndërmerrte veprimet e nevojshme për të adresuar këto çështje, edhe pse kishte mjetet.

Ajo u largua nga kompania në maj të këtij viti. /Telegrafi/