Eskalojnë protestat antiqeveritare në Bangladesh, të paktën 27 të vrarë nga përleshjet mes policisë dhe protestuesve

Të paktën 27 persona janë vrarë në Bangladesh pasi shpërthyen përleshjet mes policisë dhe protestuesve antiqeveritar, të cilët po kërkojnë që kryeministrja Sheikh Hasina të largohet nga pushteti.

Bëhet e ditur se raundi i fundit i tensioneve vjen pasi studentët kanë shpallur një fushatë mosbindjeje civile kundër qeverisë.

Policia ka përdorur gaz lotsjellës dhe plumba gome për të shpërndarë demonstruesit në disa pjesë të Bangladeshit, ku kanë mbetur të plagosur rreth 200 persona.

Në kryeqytet, Dhaka, qasja në internet në pajisjet celulare është pezulluar, me disa ofrues që u kanë thënë mediave lokale se kanë marrë urdhra nga qeveria.

Një zyrtar nga Komisioni Rregullativ i Telekomunikacionit të Bangladeshit (BTRC) tha se shërbimi i internetit 4G në zonën e qytetit të Dhakës është ndalur për momentin, por shërbimet me brez të gjerë do të vazhdojnë.

Siç raportohet, pa 4G dhe 3G njerëzit nuk mund të komunikojnë duke përdorur internetin në pajisjet e tyre celulare dhe nuk dihet se kur shërbimet e internetit do të kthehen në normalitet.

Mediat e Bangladeshit raportojnë se vdekje dhe lëndime ka në të gjithë vendin, duke përfshirë rrethet veriore të Bogra, Pabna dhe Rangpur, shkruan BBC, përcjell Telegrafi.

Një shtetrrethim është shpallur nga ora 18:00. Sipas raportimeve të mediave lokale, shtetrrethimi do të jetë në fuqi për një kohë të pacaktuar.

Ndërkohë, mijëra njerëz u mblodhën në një shesh kryesor në kryeqytet ku ka pasur incidente të dhunshme.

“I gjithë qyteti është kthyer në një fushëbetejë”, tha një polic i cili kërkoi të mbetet anonim.

Ndryshe, grupi që qëndron pas demonstratave, Studentët Kundër Diskriminimit, i ka bërë thirrje kryeministres të jap dorëheqje.

Studentët kanë kërkuar gjithashtu mbylljen e të gjitha fabrikave dhe transportit publik.

Protesta që nisi me kërkesën për heqjen e kuotave në vendet e punës në shërbimin civil muajin e kaluar është kthyer tashmë në një lëvizje më të gjerë antiqeveritare.

Më shumë se 200 njerëz u vranë në korrik, shumë prej të cilëve u qëlluan nga policia.

Rreth 10,000 njerëz thuhet se janë arrestuar në një goditje të madhe nga forcat e sigurisë në dy javët e fundit. Ndër të arrestuarit ishin mbështetës të opozitës dhe studentë.

“Sheikh Hasina jo vetëm që duhet të jap dorëheqje, por duhet të ketë një gjyq për vrasjet, plaçkitjet dhe korrupsionin”, tha Nahid Islam, një nga udhëheqësit e lëvizjes studentore. /Telegrafi/