Erdogan flet sërish rreth anëtarësimit të Suedisë dhe Finlandës në NATO: Asnjë aleatë nuk tregoi respekt ndaj sigurisë së Turqisë

NATO duhet të “kuptojë, respektojë dhe mbështesë” ndjeshmërinë e sigurisë së Turqisë, thotë Erdogan.

Presidenti turk, Recep Tayyip Erdogan tha para deputetëve të partisë së tij, AKP se pret që vendet anëtare të NATO-s të “kuptojnë” çështjen e sigurisë së Turqisë lidhur me aplikimet e Finlandës dhe Suedisë për t’iu bashkuar aleancës së NATO-s.

Lexo po ashtu Pse po i druhet Turqia anëtarësimit të vendeve nordike në NATO?

“Ne presim që aleatët tanë të kuptojnë, respektojnë dhe mbështesin ndjeshmërinë tonë. Ne kemi ndjeshmëri për të mbrojtur kufijtë tanë kundër terrorizmit. Asnjë nga aleatët tanë nuk tregoi respekt ndaj kësaj ndjeshmërie siç prisnim”, tha ai.

Ndërkohë, 68-vjeçari tha javën e kaluar se nuk i sheh “pozitivisht” aplikimet e Suedisë dhe Finlandës në NATO dhe nuk do t’i mbështeste vendet nordike, raporton cnn.

“Zgjerimi i NATO-s ka kuptim për ne vetëm në masën që respektohen ndjeshmëritë tona. Të kërkosh prej nesh mbështetje për anëtarësimin në NATO, ndërkohë që ofroni çdo lloj mbështetje për organizatën terroriste PKK/YPG, më së paku që mund të them është inkoherencë”, shtoi i pari i shtetit turk.

Lexo po ashtu Suedia dhe Finlanda reagojnë pasi Erdogan tha se mund të vendos veto për anëtarësimin e vendeve nordike në NATO

Ai akuzoi të dyja vendet se po strehojnë anëtarë të Partisë së Punëtorëve të Kurdistanit, ose PKK, militante separatiste, dhe mbështetës të klerikut me bazë në SHBA, Fethullah Gulen, të cilin Turqia i akuzon si organizator të një përpjekjeje për grusht shtet gjatë vitit 2016.

Ndryshe, PKK-ja është cilësuar si organizatë terroriste nga Turqia, Shtetet e Bashkuara dhe Bashkimi Evropian. /Telegrafi/