Enrique Iglesias koncert në Shkup

Viteve të fundit Maqedonia ka qenë një prej ndalesave të artistëve të njohur botërorë, të cilët në kuadër të turneve të tyre kanë mbajtur koncert edhe në kryeqytetin maqedonas.

Një tjetër yll i muzikës do të mbajë koncert sivjet në shtetin fqinj. Pas muzikantëve të tillë, si Carlos Santana Pinku, White Snakes e Lenny Kravitz, Enrique Ilgesias do të jetë një ndër artistët ndërkombëtar që gjatë muajve të nxehtë të verës do të interpretojnë në Maqedoni.

Koncerti i Iglesias do të mbahet në muajin qershor në Shkup. Lajmin e ka bërë publik në Facebook produksioni Avalon, i cili organizon këtë ngjarje. “Avaloni” e ka quajtur historik koncertin e Iglesias në Shkup, duke qenë se kjo do të jetë hera e tij e parë në Maqedoni dhe vetëm 8000 bileta do të jenë në dispozicion, transmeton emisioni “Express” në KTV.

Ndalesa e tij në kryeqytetin maqedonas do të jetë pjesë e turneut “Sex and Love”, nëpërmes së cilit këngëtari latin është duke promovuar albumin më të ri.

Iglesias njihet edhe për hitet “Bailando”, “Hero”, “Tonight” dhe shumë të tjera.

Adhuruesit e muzikës në Maqedoni sivjet është raportuar se do të argëtohen me koncerte të David Guetta, Robin Schulz, John Newman, që do të mbahen në muajin qershor.

Koncerti do mbahet më 20 qershor, në sallën sportive ”Boris Trajkovski”.