Ekipe për librat në Maqedoni që dështuan në konkurse

Mungesa e teksteve shkollore, posaçërisht për arsimin e mesëm profesional, pritet të përmirësohet ndjeshëm nëse autorët e teksteve shkollore i përgjigjen thirrjes të Ministrisë të Arsim dhe Shkencës (MASH) për botimin e 37 librave për lëndët profesionale në arsimin e mesëm profesional, shkruan gazeta KOHA. Janë edhe disa dhjetëra lëndë të tjera profesionale në arsimin e mesëm tre dhe dyvjeçar që kanë problemin e mungesës së teksteve shkollore, mirëpo këtë herë janë në fokus librat të cilat është provuar të botohen edhe më parë, përmes shpalljes së konkurseve përkatëse.

Por, meqë përgatitja e atyre librave ka dështuar, pa pasur nevojë të shkohet në shpalljen e konkurseve tjera, ministrja e Arsimit, Renata Deskovska, ka firmosur ditë më parë vendimin për publikimin e thirrjes publike për “hulumtimin e interesit publik për formimin e ekipeve të autorëve”, të cilët duhet të ofrohen me qëllim të përpilimit të dorëshkrimeve të atyre teksteve. Librat, të cilat kërkon ti sigurojë MASH-i nga viti i ardhshëm shkollor 2018/2019, janë për lëndët profesionale të drejtimeve të ndryshme.

Konkretisht, kërkohet botimi i librave për drejtimin e pylltarisë edhe atë për profilin e përpunuesve të drurit, pastaj për detektimin e gjeodezisë (për profilet e gjeologji-xehetari dhe metalurgji) për drejtimet e bujqësisë, veterinarisë, ndërtimtarisë, elektroteknikës, tekstilit, shërbimeve personale, makinerisë, ekonomisë (për profilet e juridikut dhe tregtisë), si dhe për drejtimet e komunikacionit dhe shëndetësisë. Autorët apo grupet e autorëve duhet të paraqesin ekipin përkatës jo më vonë se data 5 mars te organet e Shërbimit Pedagogjik, ndërsa Ministria kujton të interesuarit se botimi i librave do të kalojë përmes Komisionit Nacional të Teksteve Shkollore. Konkretisht, marrëveshja për “blerjen e autorësisë” do të nënshkruhet vetëm me ekipet e autorëve dorëshkrimet e të cilëve do të marrin “bekimin” e atij Komisioni.

Neni 9 i Ligjit të teksteve shkollore e ngarkon këtë komision me kompetenca të zgjeruara profesionale duke nis nga formimi i komisione të recensentëve për vlerësimin e dorëshkrimeve, miratimin ose jo të tyre, dhënien e mendimeve për vlerësimet paraprake të Byrosë për Zhvillimin e Arsimit, shkarkimin e komisioneve recensuese dhe formimin komisioneve profesionale nëse konsideron se të parët nuk kanë qenë në nivel të detyrës dhe deri te miratimi i vendimeve për lejim dhe përdorim të tekstit shkollor në arsimin fillor, respektivisht arsimin e mesëm.

Bazuar në nenin 17-a të ligjit për tekste shkollore, me të cilin MASH mbështet thirrjen për formimin e ekipeve të autorëve është e qartë se bëhet fjalë për libra të cilët kanë dështuar të botohen më parë.

Në rastet kur për një libër të caktuar nuk paraqiten autorë në Konkursin e shpallur paraprakisht apo kur një dorëshkrim i caktuar nuk merr pëlqimin e Komisionit Nacional të Librave, neni 17-a i jep të drejtë Ministres të Arsimit, të kërkojë formimin ekipeve për përgatitjen e atyre librave. Propozim për formimin e ekipeve duhet të vjen nga drejtoria e Shërbimit Pedagogjik. Një rasti i këtillë është edhe thirrja e fundit e MASH-it për formimin e ekipeve të autorëve për përgatitjen e 37 tekste për arsimin e mesëm profesional. /Koha.mk/