Edhe Kurti takon senatorin Menendez, e njofton për qëndrimet e Qeverisë për dialogun me Serbinë

Kryeministri i Republikës së Kosovës, Albin Kurti ka takuar të premten senatorin amerikan, Bob Menendez, gjatë punimeve në Konferencën për Siguri në Mynih.

Me senatorin Menendez, njëherësh Kryetar i Komisionit të Senatit të Shteteve të Bashkuara për Marrëdhëniet me Jashtë, Kurti ka diskutuar për marrëdhëniet bilaterale, partneritetin e ngushtë ndërmjet dy vendeve dhe fuqizimin e mëtejmë të tij.

“Në takimin e mbajtur sot në kuadër të Konferencën e Sigurisë në Mynih, Kryeministri Kurti e njoftoi senatorin për rezultatet e deritanishme të qeverisë, me theks te sundimi i ligjit. Po ashtu e falënderoi senatorin Menendez për mbështetjen aktive të tij ndaj Kosovës në Senatin amerikan”, thuhet në njoftimin e Zyrës së Kryeministrit.

Kryeministri dhe senatori kanë biseduar edhe për procesin e dialogut, raportin me Serbinë dhe propozimin evropian, me ç’rast “Kurti e njoftoi senatorin Menendez për qëndrimet e Qeverisë së Republikës së Kosovës dhe konstruktivitetin e treguar përgjatë tërë procesit”.

Me senatorin Menendez të premten është takuar edhe presidentja Vjosa Osmani, të cilin siç ka bërë të ditur ajo, e ka falënderuar për mbështetjen e palëkundur ndaj Kosovës.

“E falënderova për mbështetjen e palëkundur për Republikën e Kosovës dhe përkushtimin për avancimin e vazhdueshëm të marrëdhënieve tona dypalëshe”, ka shkruar Osmani në Twitter. /Telegrafi/