“E përdor fatkeqësinë për promovim” – Vuçiq vizitoi me 11 kamera të lënduarit nga Maqedonia, shkakton reagime të mëdha

Presidenti i Serbisë, Aleksandar Vuçiq, i shoqëruar nga kamerat dhe një numër i madh gazetarësh, vizitoi pacientët nga Maqedonia e Veriut, të cilët, pas zjarrit tragjik në një klub nate në Koçan, u transferuan për trajtim në Beograd.

Tragjedia, në të cilën humbën jetën 59 persona dhe mbi 150 të tjerë u plagosën, përfshirë edhe ata me djegie të rënda, ka tronditur rajonin.

Edhe pse çdo ndihmë është e mirëpritur, veprimi i liderit serb ka shkaktuar kritika të ashpra, pasi ai organizoi një spektakël mediatik në dhomat e spitalit, duke injoruar protokollet mjekësore dhe dinjitetin e pacientëve. Ai gjithashtu publikoi foto në rrjetet sociale nga njësia e kujdesit intensiv, gjë që shumë e cilësuan si shfrytëzim të pahijshëm të tragjedisë për përfitime personale.

View this post on Instagram

A post shared by Aleksandar Vučić (@buducnostsrbijeav)

Reagimet në rrjetet sociale ishin të ashpra. “Pacientët me djegie të rënda janë jashtëzakonisht të ndjeshëm imunologjikisht. Kjo grumbullim rreth tyre është e papërgjegjshme nga pikëpamja mjekësore!”, shkroi një përdorues i platformës X. Të tjerë theksuan se në vendet e civilizuara vetëm mjekët japin informacione për gjendjen e pacientëve, ndërsa Vuçiq, i rrethuar nga kamerat, mbajti një performancë politike drejtpërdrejt nga spitali.

Mediat dhe ekspertët maqedonas gjithashtu reaguan. Mjeku Nenad Lazarov i bëri thirrje Vuçiqit që të ndalojë “cirkun mediatik” rreth njerëzve të plagosur rëndë.

“Faleminderit për ndihmën, por kjo nuk është mënyra e duhur. Djegiet janë plagë të hapura, një grumbullim i tillë rrezikon rikuperimin e pacientëve”, tha ai.

Ndërsa qytetarët e rajonit ndajnë dhimbjen me të prekurit nga tragjedia, veprimi i presidentit serb ka nxjerrë edhe një herë në pah prirjen e tij për të shfrytëzuar fatkeqësitë e të tjerëve për imazh personal politik, pa marrë parasysh etikën, protokollet mjekësore dhe dinjitetin e atyre që kanë nevojë reale për ndihmë. /Telegrafi/