Pauza e duhur ndihmon trupin të tretë, djegë kalori dhe shmangë sikletin gjatë stërvitjes
Nëse nxitoni të stërviteni menjëherë pasi keni ngrënë, mund të përballeni me fryrje, ngërçe apo të përziera. Por, nga ana tjetër, nëse prisni shumë gjatë, mund të ndiheni pa fuqi dhe me nivel të ulët energjie, duke e bërë stërvitjen më të vështirë dhe më pak produktive.
Sipas dr. Laura Harrell Raffals nga Klinika “Mayo”, një udhëzues praktik është: prisni rreth 3 deri në 4 orë pas një vakti të plotë dhe rreth 1 deri në 2 orë pas një mesvakti të lehtë, para se të filloni një stërvitje intensive.
Ecja e lehtë menjëherë pas ngrënies mund të jetë madje e dobishme, pasi ndihmon tretjen dhe qarkullimin e gjakut. Por për ushtrime më të forta, si vrapimi, pesha ose HIIT, trupit i duhet kohë për të përpunuar ushqimin, në mënyrë që energjia të jetë e gatshme për muskujt, e jo të mbetet në stomak, transmeton Telegrafi
Pse duhet të respektoni këtë interval?
Duke i dhënë trupit kohën e nevojshme për tretje, shmangni shqetësime si përzierje, urth apo fryrje, të cilat shpesh e bëjnë stërvitjen të papërshtatshme. Përveç kësaj, një vakti i tretur mirë do të thotë më shumë energji të qarkullueshme, gjë që e rrit performancën dhe përqendrimin. .
Mbani mend: secili organizëm reagon ndryshe. Kohëzgjatja e pritjes varet nga:
▪ sasia dhe lloji i ushqimit (p.sh., ushqimet me yndyrë tretet më ngadalë),
▪ tipi i stërvitjes (ecje, kardio e lehtë, apo pesha intensive),
▪ gjatësia dhe intensiteti i seancës.
Mos harroni ujin!
Hidratimi është çelës, posaçërisht para një stërvitjeje të gjatë ose me intensitet të lartë. Mjekja këshillon të pini 2 deri në 3 gota ujë brenda 2-3 orëve para stërvitjes. Po ashtu, mos harroni të pini ujë edhe gjatë dhe pas stërvitjes.
Çfarë të hani para një stërvitjeje në mëngjes?
Nëse planifikoni të stërviteni herët në mëngjes, mos dilni krejt pa ushqim. Një vakt i lehtë 30-60 minuta më parë është ideal.
Zgjidhni ushqime të thjeshta për stomakun, që nuk rëndojnë:
▪ një banane,
▪ një grusht fruta të thata,
▪ një tost i lehtë integral,
▪ pak jogurt ose një smoothie.
Nëse jeni mësuar të ushtroni me stomakun bosh, nuk ka asgjë të keqe, por mund të mos keni të njëjtin nivel përqendrimi dhe qëndrueshmërie, sidomos për ushtrime të zgjatura.
Në fund, mbani mend: Të ushtruarit me trup të përgatitur dhe të ushqyer në kohën e duhur, do t’ju ndihmojë të jepni maksimumin, të shmangni sikletet dhe të shijoni përfitimet e çdo seance. /Telegrafi/
