Dyshimet për keqpërdorim të pozitës zyrtare, largohet përkohësisht nga puna U.D i Spitalit të Ferizajt

Shërbimi Spitalor Klinik dhe Universitar i Kosovës (ShSKUK) ka njoftuar se është larguar nga puna përkohësisht U.D i Spitalit të Përgjithshëm në Ferizaj, Halit Gërbeshi.

Siç thuhet në njoftimin e bërë nga ShSKUK ky vendim është marrë pasi Gërbeshi është ndaluar 48 orë nga Prokuroria Themelore në Ferizaj, pasi që i njëjti dyshohet për “Keqpërdorimi i pozitës apo autoritetit zyrtar”, transmeton Telegrafi.

“Shërbimi Spitalor Klinik dhe Universitar i Kosovës informon opinionin se pas njoftimit për ndalimin e Dr. Halit Gërbeshit U.D. Drejtor i Spitalit të Përgjithshëm në Ferizaj prej 48 orësh nga Prokuroria Themelore e Ferizajt, i njëjti është larguar përkohësisht nga puna, konform legjislacionit në fuqi”, thuhet në njoftim.

ShSKUK shton tutje se, detyrat dhe përgjegjësitë e Drejtorit të Spitalit në Ferizaj do t’i kryejë drejtori mjekësor i spitalit.

Lexo po ashtu Ndalohet ushtruesi i detyrës së Drejtorit të Spitalit të Përgjithshëm në Ferizaj për keqpërdorim të detyrës zyrtare

Ndryshe, Prokuroria Themelore në Ferizaj, Departamenti për Krime të Rënda, ka njoftuar opinionin publik se pas një hetimi një mujor nga ana e Prokurorisë, me vendim të Prokurorit të Shtetit, ka ndaluar të dyshuarin H.G., në kohëzgjatje prej 48 orësh, pasi dyshohet se i njëjti ka kryer veprën penale “Keqpërdorimi i pozitës apo autoritetit zyrtar”.

Sipas Prokurorisë, dyshohet se H.G., si Ushtrues i detyrës së Drejtorit të Spitalit të Përgjithshëm në Ferizaj, ka keqpërdorur detyrën e tij zyrtare, duke e furnizuar veturën e tij private me derivate të naftës në kuadër të tenderit të paraparë për Spitalin e Përgjithshëm në Ferizaj. /Telegrafi/